អ្នកការទូតជាន់ខ្ពស់របស់សហភាពអឺរ៉ុប (EU) នៅថ្ងៃព្រហស្បតិ៍ (ទី១៨ ខែមេសា) នេះ បាននិយាយថា បណ្តាប្រទេសសមាជិក EU ត្រូវតែបញ្ជូនប្រព័ន្ធប្រឆាំងមីស៊ីលរបស់ខ្លួនទៅពង្រឹងការការពារដែនអាកាសរបស់អ៊ុយក្រែន ខណៈដែលរុស្ស៊ីវាយប្រហារទីក្រុងនានារបស់ប្រទេសនេះ ដោយព្រមានថា អឺរ៉ុបមិនអាចពឹងផ្អែកតែលើសហរដ្ឋអាមេរិក ដើម្បីជួយទីក្រុងគីវនោះទេ។

គួរបញ្ជាក់ថា រយៈពេលជាង ២ឆ្នាំនៃការលុកលុយទាំងស្រុងរបស់រុស្ស៊ី អ៊ុយក្រែនកំពុងប្រឈមនឹងការខ្វះខាតគ្រាប់រំសេវ ដោយការផ្តល់មូលនិធិដ៏សំខាន់ពីសហរដ្ឋអាមេរិក ត្រូវបានរារាំងអស់រយៈពេលជាច្រើនខែ ដោយគណបក្សសាធារណរដ្ឋនៅសភា ហើយ EU ខកខានក្នុងការបញ្ជូនអាវុធឲ្យបានទាន់ពេលវេលា។

នៅឯកិច្ចប្រជុំក្រុមរដ្ឋមន្ត្រីការបរទេសនៃប្រទេសមានឧស្សាហកម្មលូតលាស់ទាំងប្រាំ៧ (G7) នៅកោះ Capri ប្រទេសអ៊ីតាលី ប្រមុខគោលនយោបាយការបរទេសរបស់ EU លោក Josep Borrell បានប្រាប់អ្នកសារព័ត៌មានថា៖ «យើងមានមីស៊ីល Patriot (ប្រព័ន្ធមីស៊ីលបាញ់ពីដីទៅអាកាស) និងប្រព័ន្ធប្រឆាំងមីស៊ីល។ យើងត្រូវយកមីស៊ីលទាំងនោះចេញពីបន្ទាយរបស់យើង ហើយបញ្ជូនទៅកាន់អ៊ុយក្រែន ជាកន្លែងដែលសង្រ្គាមកំពុងផ្ទុះឡើង»។

លោកបានបន្ថែមថា៖ «បើមិនដូច្នេះទេ ប្រព័ន្ធអគ្គិសនីរបស់អ៊ុយក្រែននឹងត្រូវបំផ្លាញ ហើយគ្មានប្រទេសណាមួយអាចប្រយុទ្ធបានដោយមិនមានអគ្គិសនីសម្រាប់ប្រើប្រាស់នោះទេ មិនថានៅផ្ទះ ក្នុងរោងចក្រឧស្សាហកម្ម និងបណ្តាញអ៊ីនធឺណិត»។

ការការពារដែនអាកាសរបស់អ៊ុយក្រែន គឺជាបញ្ហាសំខាន់ចម្បង សម្រាប់រដ្ឋមន្ត្រីដែលបានជួបប្រជុំគ្នា នៅក្នុងប្រទេសអ៊ីតាលី បន្ទាប់ពីមានការអំពាវនាវរបស់អាល្លឺម៉ង់ កាលពីថ្ងៃទី១៧ ខែមេសា ទៅកាន់ EU និងអង្គការណាតូ (NATO) ឲ្យធ្វើកិច្ចការបន្ថែមទៀត ដើម្បីជួយដល់ទីក្រុងគីវ៕