រុស្សីបានចោទប្រកាន់កងកម្លាំងអ៊ុយក្រែនថា បានបាញ់ផ្លោងម្តងហើយម្តងទៀតទៅលើមន្ទីរពេទ្យ ក្នុងតំបន់គ្រប់គ្រងដោយរុស្ស៊ីនៃប្រទេសអ៊ុយក្រែន ជាមួយនឹងអាវុធលោកខាងលិច នៅថ្ងៃព្រហស្បតិ៍នេះ ហើយបាននិយាយថា លោកខាងលិច និងអង្គការសុខភាពពិភពលោក (WHO) មិនបានអើពើចំពោះការវាយប្រហារនេះ។

ពុំមានការអត្ថាធិប្បាយភ្លាមៗពីអ៊ុយក្រែនទេ។ រុស្ស៊ី និងអ៊ុយក្រែន ចោទប្រកាន់គ្នាទៅវិញទៅមកពីបទឧក្រិដ្ឋកម្មសង្គ្រាម។ ប្រទេសទាំងពីរ បដិសេធការចោទប្រកាន់គ្នាទៅវិញទៅមក ហើយក៏មិនមានការអត្ថាធិប្បាយភ្លាមៗពីអង្គការសុខភាពពិភពលោកWHOដែរ។

ការចោទប្រកាន់នេះ ត្រូវបានធ្វើឡើងដោយអ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova ដែលបានប្រាប់អ្នកយកព័ត៌មានថា កងកម្លាំងអ៊ុយក្រែន បានកំណត់គោលដៅម្តងហើយម្តងទៀតទៅលើមន្ទីរពេទ្យ និងវេជ្ជបណ្ឌិត នៅក្នុងតំបន់អ៊ុយក្រែនចំនួន៤ ដែលទីក្រុងមូស្គូនិយាយថា ខ្លួនបានជាឧបសម្ព័ន្ធនោះ។

អ្នកស្រី Zakharova បានចុះបញ្ជីកាលបរិច្ឆេទ និងទីតាំងនៃការវាយប្រហារក្នុងប៉ុន្មានខែថ្មីៗនេះ ហើយបាននិយាយថា ព័ត៌មានដូចគ្នានេះ ត្រូវបានផ្តល់ទៅឲ្យWHO ដែលអ្នកស្រីបាននិយាយថា មិនបានធ្វើអ្វីជាមួយទិន្នន័យនោះទេ។

អ្នកស្រី បានបញ្ជាក់ថា៖«វេជ្ជបណ្ឌិតពិតប្រាកដ កំពុងស្លាប់ដោយការបាញ់ផ្លោងដោយទីក្រុងគីវ ជាមួយនឹងអាវុធដែលផ្គត់ផ្គង់ដោយលោកខាងលិច» ។

អ្នកស្រី Zakharova បាននិយាយថា លោកខាងលិច និងប្រព័ន្ធផ្សព្វផ្សាយលោកខាងលិច មិនអើពើចំពោះឧក្រិដ្ឋកម្មណាមួយដែលធ្វើឡើងដោយអ៊ុយក្រែន ហើយគ្រាន់តែចង់រិះគន់រុស្ស៊ីប៉ុណ្ណោះ។