ប្រធានាធិបតីអាមេរិកលោក Joe Biden បានហៅចិនថា ជា «ប្រទេសស្អប់ខ្ពើមជនបរទេស» ខណៈដែលលោកបានលើកឡើងពីវិបត្តិសេដ្ឋកិច្ចរបស់ប្រទេសអាស៊ីមួយនេះ ដោយនេះជាកិច្ចប្រឹងប្រែងលោកបានព្យាយាមផ្ដល់ហេតុផលដ៏ល្អបំផុត សម្រាប់ភាពរឹងមាំនៃសេដ្ឋកិច្ចរបស់សហរដ្ឋអាមេរិក អំឡុងពេលធ្វើសុន្ទរកថាយុទ្ធនាការមួយ នៅរដ្ឋប្រកួតប្រជែង Pennsylvania។

កាលពីថ្ងៃពុធ (ទី១៧ ខែមេសា) នៅក្នុងសុន្ទរកថាទៅកាន់កម្មករដែក នៅទីក្រុង Pittsburgh លោក Biden បាននិយាយអំពីប្រទេសចិនថា៖ «ពួកគេមានចំនួនប្រជាជនដែលចូលនិវត្តន៍ច្រើនជាងប្រជាជនធ្វើការ។ ពួកគេមិននាំចូលអ្វីទាំងអស់។ ពួកគេគឺជាអ្នកស្អប់ខ្ពើមជនបរទេស ពោលគ្មានអ្នកផ្សេងចូលទៅបានទេ។ ពួកគេមានបញ្ហាយ៉ាងពិតប្រាកដ»។

ការលើកឡើងរបស់លោកប្រធានាធិបតីបែបនេះ កើតមានឡើងបន្ទាប់ពីមានការសន្ទនាតាមទូរសព្ទ កាលពី ២សប្តាហ៍មុន ជាមួយប្រធានាធិបតីចិន លោក Xi Jinping ដោយនេះជាលើកដំបូងរបស់ការនិយាយគ្នលើកដំបូងរបស់មេដឹកនាំទាំង២ គិតចាប់តាំងពីមានកិច្ចប្រជុំទល់មុខគ្នា កាលពីខែវិច្ឆិកា។ ទោះបីជាទំនាក់ទំនងជារួម មានស្ថិរភាព ក៏ភាពតានតឹងកំពុងកើនឡើង ជុំវិញការវិនិយោគរបស់ចិន ក្នុងការផលិតដែលអាចនាំឲ្យបាត់បង់ការងារ ក្នុងចំណោមកម្មករនិយោជិតដែលធ្វើការដោយដៃនេះ។

ក្រសួងការបរទេសចិន ដែលពីមុនបានវាយបកទៅវិញ ចំពោះការលើកឡើងបែបនេះ បានសម្ដែងការយល់ឃើញជាពិសេស នៅថ្ងៃព្រហស្បតិ៍ (ទី១៨ ខែមេសា) នេះ ដោយនៅក្នុងសន្និសីទសារព័ត៌មានប្រចាំថ្ងៃ នាទីក្រុងប៉េកាំង អ្នកនាំពាក្យរបស់ក្រសួង លោក Lin Jian បាននិយាយថា៖ «ប្រទេសចិនចង់សួរសហរដ្ឋអាមេរិកវិញថា តើសម្ដីនេះសំដៅលើប្រទេសចិន ឬក៏សហរដ្ឋអាមេរិកខ្លួនឯងផ្ទាល់»៕