នាយករដ្ឋមន្ត្រីនូវែលហ្សេឡង់ លោក Christopher Luxon បានប្រាប់សន្និសីទសារព័ត៌មានរួមគ្នាមួយ នៅថ្ងៃព្រហស្បតិ៍ (១៨ មេសា) នេះថា ប្រទេសហ្វីលីពីន និងនូវែលហ្សេឡង់ នឹងលើកកំពស់ទំនាក់ទំនងទៅជា «ភាពជាដៃគូគ្រប់ជ្រុងជ្រោយ» នៅឆ្នាំ២០២៦។
ជាមួយគ្នានេះ បន្ទាប់ពីកិច្ចប្រជុំទ្វេភាគីជាមួយប្រធានាធិបតីហ្វីលីពីន លោក Ferdinand Marcos Jr លោក Luxon បាននិយាយថា នូវែលហ្សេឡង់ក៏ប្តេជ្ញាពង្រឹងទំនាក់ទំនងការពារជាតិរបស់ខ្លួនជាមួយហ្វីលីពីនផងដែរ។
គួរបញ្ជាក់ថា ដំណើរទស្សនកិច្ចនៅទីក្រុងម៉ានីលរបស់លោក Luxon កើតឡើងបន្ទាប់ពីការធ្វើដំណើរជាផ្លូវការទៅកាន់ប្រទេសសិង្ហបុរី និងថៃ ជាកន្លែងដែលលោកបានស្វែងរកការពង្រឹងការចូលរួម នៅក្រៅប្រទេសរបស់ប្រទេសលោក។ វាក៏ជាដំណើរទស្សនកិច្ចលើកដំបូងរបស់នាយករដ្ឋមន្ត្រីនូវែលហ្សេឡង់ទៅកាន់ប្រទេសហ្វីលីពីនផងដែរ ក្នុងរយៈពេល ១៤ឆ្នាំ។ ប្រទេសទាំង២ នឹងប្រារព្ធខួបលើកទី៦០ នៃទំនាក់ទំនងការទូតរបស់ខ្លួន នៅឆ្នាំ២០២៦៕