មេបញ្ជាការជាន់ខ្ពស់ម្នាក់របស់កងឆ្មាំបដិវត្តន៍អ៊ីរ៉ង់ នៅថ្ងៃព្រហស្បតិ៍ (ទី១៨ ខែមេសា) នេះ បាននិយាយថា អ៊ីរ៉ង់អាចពិនិត្យឡើងវិញនូវ «គោលលទ្ធិនុយក្លេអ៊ែរ» របស់ខ្លួន ចំពេលមានការគំរាមកំហែងរបស់អ៊ីស្រាអែល ដោយលើកឡើងពីការព្រួយបារម្ភអំពីកម្មវិធីនុយក្លេអ៊ែររបស់ទីក្រុងតេអេរ៉ង់ ដែលខ្លួនតែងតែនិយាយថា មានសម្រាប់តែគោលបំណងសន្តិភាពប៉ុណ្ណោះ។

លោក Ahmad Haghtalab មេបញ្ជាការទទួលបន្ទុកសន្តិសុខនុយក្លេអ៊ែរ បាននិយាយថា៖ «ការពិនិត្យឡើងវិញលើគោលការណ៍ និងនយោបាយនុយក្លេអ៊ែររបស់យើង ក៏ដូចជាការពិចារណាដែលមានទំនាក់ទំនងគ្នាកាលពីមុន គឺអាចធ្វើទៅបានទាំងស្រុង»។

គួរបញ្ជាក់ថា មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បាននិយាយចុងក្រោយពាក់ព័ន្ធនឹងកម្មវិធីនុយក្លេអ៊ែររបស់ទីក្រុងតេអេរ៉ង់ ដែលលោកខាងលិចសង្ស័យថា មានគោលបំណងយោធា។ លោក Khamenei បាននិយាយជាច្រើនលើកច្រើនសាថា ក្រុងតេអេរ៉ង់មិនដែលបន្តការសាងសង់ ឬប្រើអាវុធនុយក្លេអ៊ែរ ដែលសាសនារបស់ខ្លួនហាមឃាត់នោះឡើយ៕