រដ្ឋមន្ត្រីការបរទេសចិន លោក Wang Yi នៅថ្ងៃព្រហស្បតិ៍ (១៨ មេសា) នេះ បាននិយាយថា ប្រទេសចិន និងឥណ្ឌូនេស៊ី បានសន្យាបន្តរក្សាសន្តិភាព និងស្ថិរភាពក្នុងតំបន់ ហើយយល់ស្របគ្នាថា សេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិស្តីពីបទឈប់បាញ់ នៅតំបន់ហ្កាហ្សាត្រូវតែអនុវត្តទាំងស្រុង។

លោក Wang បានធ្វើការកត់សម្គាល់បែបនេះបន្ទាប់ពីមានកិច្ចប្រជុំនៅទីក្រុងហ្សាការតា ជាមួយសមភាគីឥណ្ឌូនេស៊ីរបស់លោក គឺលោកស្រី Retno Marsudi ដែលបានសង្កត់ធ្ងន់លើតម្រូវការចាំបាច់ សម្រាប់ដំណោះស្រាយរដ្ឋ២ នៅតំបន់ហ្កាហ្សា។ លោកស្រី Marsudi បានប្រាប់ថា៖ «ភាគីទាំង២ ក៏បានព្រមព្រៀងគ្នាថា បញ្ហារបស់ប្រជាជនប៉ាឡេស្ទីន ត្រូវតែដោះស្រាយដោយយុត្តិធម៌ តាមរយៈដំណោះស្រាយរដ្ឋ២ ប្រសិនបើយើងចង់ឃើញស្ថិរភាព នៅតំបន់មជ្ឈិមបូព៌ា»។

បើយោងតាមលោកស្រី Marsudi បានឲ្យដឹងថា លោក Wang ក៏បានជួបផងដែរជាមួយលោក Joko Widodo ដែលជាប្រធានាធិបតីជិតផុតអាណត្តិរបស់ឥណ្ឌូនេស៊ី ដោយក្នុងជំនួបនេះ អ្នកទាំង២ បានពិភាក្សាអំពីទស្សនៈរបស់ប្រទេសទាំង២ ចំពោះប៉ាឡេស្ទីន។ ហើយក្រសួងការបរទេសចិនបានឲ្យដឹងនៅក្នុងសេចក្តីថ្លែងការណ៍មួយថា អំឡុងដំណើរទស្សនកិច្ចរបស់លោកនេះ រដ្ឋមន្ត្រីការបរទេសចិនរូបនេះ បានជួបពិភាក្សាជាមួយប្រធានាធិបតីជាប់ឆ្នោត និងជារដ្ឋមន្ត្រីការពារជាតិឥណ្ឌូនេស៊ីលោក Prabowo Subianto ដោយបានពិភាក្សាអំពីផែនការធ្វើសមយុទ្ធយោធារួមគ្នា រវាងប្រទេសទាំង២។

នៅថ្ងៃសុក្រ (ទី១៩ ខែមេសា) លោក Wang គ្រោងនឹងចូលរួមកិច្ចប្រជុំយន្តការសហប្រតិបត្តិការកិច្ចសន្ទនាកម្រិតខ្ពស់ រវាងចិន និងឥណ្ឌូនេស៊ី ជាមួយរដ្ឋមន្ត្រីជាន់ខ្ពស់ឥណ្ឌូនេស៊ីមួយចំនួន នៅទីក្រុង Labuan Bajo ដើម្បីពិភាក្សាអំពីកិច្ចសហប្រតិបត្តិការឲ្យកាន់តែលម្អិតបន្ថែមទៀត៕