របាយការណ៍ប្រព័ន្ធផ្សព្វផ្សាយបាននិយាយថា រដ្ឋាភិបាលកូរ៉េខាងត្បូង ត្រូវបានគេរំពឹងថានឹងប្រកាសនៅថ្ងៃសុក្រ (១៩ មេសា) នេះថា ខ្លួនមានឆន្ទៈក្នុងការកែសម្រួលផែនការបង្កើនការចូលរៀននៅសាលាវេជ្ជសាស្ត្រ ក្នុងគោលបំណងដើម្បីបញ្ចប់ការតវ៉ាដោយក្រុមគ្រូពេទ្យហាត់ការ និងបន្ទាប់ពីគណបក្សកាន់អំណាចបរាជ័យក្នុងការបោះឆ្នោត។

ប្រព័ន្ធថែទាំសុខភាពរបស់ប្រទេសនេះស្ថិតនៅក្រោមសម្ពាធដោយសារតែភាពជាប់គាំងអូសបន្លាយរវាងរដ្ឋាភិបាល និងវេជ្ជបណ្ឌិត ជុំវិញផែនការជំរុញការចូលរៀននៅសាលាវេជ្ជសាស្ត្រចំនួន ២.០០០ នាក់បន្ថែមពីលើចំនួន ៣.០០០ នាក់ ដែលចាប់ផ្តើមនៅឆ្នាំ២០២៥។

កាលពីថ្ងៃព្រហស្បតិ៍ (១៨ មេសា) ព្រឹទ្ធបុរសសាលាវេជ្ជសាស្ត្រមួយចំនួនបានស្នើឱ្យកាត់បន្ថយនូវការកើនឡើងនៃចំនួនចូលរៀងក្នុងកំណែទម្រង់នោះរហូតដល់ពាក់កណ្តាល ហើយអនុញ្ញាតឱ្យសាកលវិទ្យាល័យមានភាពបត់បែនក្នុងការកំណត់កូតារបស់ពួកគេ ដែលជាមធ្យោបាយដ៏មានសក្តានុពលមួយដើម្បីឈានដល់ការសម្របសម្រួល។

ទីភ្នាក់ងារសារព័ត៌មាន យ៉ុនហាប់ (Yonhap) បានរាយការណ៍ដោយសំអាងដល់ការិយាល័យនាយករដ្ឋមន្រ្តីថា លោកនាយករដ្ឋមន្ត្រី ហាន ដុកស៊ូ (Han Duck-soo) នឹងកោះប្រជុំផ្ទៃក្នុងរវាងទីភ្នាក់ងារ ហើយទំនងជានឹងទទួលយកសំណើនោះ ហើយធ្វើសន្និសីទខ្លីមួយដើម្បីបង្ហាញការសម្រេចចិត្តនៅម៉ោងប្រហែល ៣ រសៀល (ម៉ោងក្នុងស្រុក)៕