ឯកឧត្តម ហេង ស៊ីឡេង សមាជិកគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប បាន​អំពាវនាវដល់សមាជិកក្រុមប្រឹក្សាឃុំ-សង្កាត់ទាំងអស់អញ្ជើញពិនិត្យទិន្នន័យរបស់ខ្លួន ខណៈ​ការ​បិទផ្សាយបញ្ជីបោះឆ្នោតដំបូងចាប់ផ្តើមនាថ្ងៃស្អែក។

នៅថ្ងៃទី១៩ ខែមេសា ឆ្នាំ២០២៤ ឯកឧត្តម ហេង ស៊ីឡេង សមាជិក គ.ជ.ប បានអញ្ជើញ​ដឹកនាំ​កិច្ច​ប្រជុំ​ផ្សព្វ​ផ្សាយ​ជាមួយភាគីពាក់ព័ន្ធស្តីពី ការរៀបចំបញ្ជីបោះឆ្នោតដំបូង ការបិទផ្សាយ​បញ្ជី​បោះ​ឆ្នោតដំបូង និងប្តឹងតវ៉ា ឬជំទាស់ និងការដោះស្រាយបណ្តឹងលើបញ្ជីបោះឆ្នោតដំបូង ដែល​មាន​ការ​ចូលរួមពីបណ្តាក្រសួង-ស្ថាប័ន គណបក្សនយោបាយ និងអង្គការសង្គមស៊ីវិល។

ឯកឧត្តម ហេង ស៊ីឡេង មានប្រសាសន៍ថា ការរៀបចំបញ្ជីបោះឆ្នោតដំបូងអនុវត្តតាមបទបញ្ជា និង​នីតិវិធីសម្រាប់ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុម ប្រឹក្សាក្រុង ក្រុម​ប្រឹក្សាស្រុក ក្រុមប្រឹក្សាខណ្ឌ បន្ទាប់ពីទទួលបានបញ្ជីឈ្មោះសមាជិកក្រុមប្រឹក្សាឃុំ- សង្កាត់​នៅ​ក្នុង​មុខតំណែង រួមនឹងរបាយការណ៍ចុះឈ្មោះបោះឆ្នោតពីគណៈកម្មការរាជធានី- ខេត្ត​រៀប​ចំ​ការ​បោះឆ្នោតរួចមក នាយកដ្ឋានគ្រប់គ្រងទិន្នន័យអ្នកបោះឆ្នោត និងបញ្ជីបោះឆ្នោត នៃ​អគ្គ​នាយកដ្ឋាន​សេវាកម្មច្បាប់ និងបច្ចេកទេស បានធ្វើការត្រួតពិនិត្យ និងផ្ទៀងផ្ទាត់យ៉ាងហ្មត់ចត់ ដោយ​ផ្អែកជាមូលដ្ឋានលើបញ្ជីបេក្ខជនជាប់ឆ្នោតសមាជិកក្រុមប្រឹក្សាឃុំ សង្កាត់ផ្លូវការ ដែល​មាន​រក្សា​ទុក​ជាឯ​កសារនៅ គ.ជ.ប។

ឯកឧត្តម មានប្រសាសន៍ទៀតថា ការបិទផ្សាយបញ្ជីបោះឆ្នោតដំបូង គឺដើម្បីបម្រើគោលដៅ នៃ​ការ​ពិនិត្យ​កែតម្រូវតាមរយៈការប្តឹងតវ៉ា ឬការប្តឹងជំទាស់ទាក់ទងទៅនឹងបញ្ជីបោះឆ្នោតដំបូង ដោយ​ត្រូវ​អនុវត្តនីតិវិធី និង ដំណាក់កាលនៃបណ្ដឹង។

ទន្ទឹមគ្នានេះ ឯកឧត្តម បានបញ្ជាក់ចំពោះនីតិវិធីលើការប្តឹងតវ៉ា ឬការប្តឹងជំទាស់ ដោយ​ការ​ប្តឹង​តវ៉ា៖ ពាក្យបណ្តឹងតវ៉ាអាចធ្វើឡើងអំពីការបាត់ឈ្មោះរបស់អ្នកបោះឆ្នោត ឬមាន​ឈ្មោះ​ក្នុង​បញ្ជី​បោះឆ្នោត ប៉ុន្តែកត់ត្រាមិនច្បាស់លាស់ ឬមិនត្រឹមត្រូវ ឬមានឈ្មោះក្នុងបញ្ជីបោះឆ្នោតនៃក្រុង ស្រុក ខណ្ឌផ្សេង។ ដោយឡែកការប្តឹងជំទាស់៖ ពាក្យបណ្តឹង​ជំទាស់​អា​ច​ធ្វើ​ឡើង​ចំពោះ​បុគ្គ​ល​ណា​ម្នាក់​ដែលមាន ឈ្មោះក្នុងបញ្ជីបោះឆ្នោតដំបូង ជាជនដែលពុំមាន​សិទ្ធិបោះឆ្នោត​ដោយ​មិន​មែន​ជា​សមាជិក​ក្រុមប្រឹក្សាឃុំ-សង្កាត់នៅក្នុងមុខតំណែងនៅក្នុងក្របខណ្ឌនៃក្រុង ស្រុក ខណ្ឌ​នីមួយៗ​។

នាឱកាសនោះ ឯកឧត្តម បានអំពាវនាវដល់សមាជិកក្រុមប្រឹក្សាឃុំ-សង្កាត់ក្នុង​មុខ​តំណែង​ទាំង​អស់​អញ្ជើញ​ពិនិត្យ​ទិន្នន័យរបស់ខ្លួន អំឡុងពេលការបិទ​ផ្សាយ​បញ្ជី​បោះ​ឆ្នោត​ដំបូង​ចាប់​ផ្តើម​នា​ថ្ងៃ​ទី២០ ខែមេសា ឆ្នាំ២០២៤ ស្អែកនេះ។

សូមជម្រាបថា គ.ជ.ប បានប្រកាសទទួលស្គាល់ជាផ្លូវការចំពោះគណបក្សនយោបាយចំនួន៥ ឱ្យ​ចូល​រួម​ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ អាណត្តិទី៤ ឆ្នាំ​២០២៤ ក្នុងនោះ រួមមាន៖ គណបក្សប្រជាជនកម្ពុជា, គណបក្សឆន្ទះខ្មែរ ,គណបក្សកម្លាំងជាតិ, គណបក្ស​ហ្វ៊ុនស៊ិនប៉ិច និងគណបក្សខ្មែររួបរួមជាតិ ដោយការ​បោះឆ្នោត​នេះ​នឹង​ប្រព្រឹត្ត​ទៅ​នា​ថ្ងៃ​ទី២៦ ខែឧសភា ឆ្នាំ២០២៤៕ អត្ថបទ៖ សេក ឧត្តម