ភ្នំពេញ ៖ គណៈបញ្ជាការឯកភាពរាជធានីភ្នំពេញ បានខិតខំប្រឹងប្រែងបំពេញតួនាទីភារកិច្ច ដើម្បី​កែលម្អយន្តការផ្តល់សេវាសាធារណៈ សេវាសន្តិសុខជាតិ រួមចំណែកថែរក្សា​ស្ថិរភាព​នយោបាយ សន្តិសុខសង្គម និងសណ្តាប់ធ្នាប់សាធារណៈប្រកបដោយស្មារតីម្ចាស់ការ ជាមួយ​នឹង​ការ​ចាត់តាំងអនុវត្តយ៉ាងម៉ឺងម៉ាត់នូវគោលនយោបាយ ភូមិ ឃុំ-សង្កាត់ មានសុវត្ថិភាព បាន​យ៉ាង​ល្អ​ប្រសើរ។ នេះជាការលើកឡើងរបស់លោក ហ៊ុន សុរិទ្ធី អភិបាលរង​រាជ​ធានី​ភ្នំពេញ​ក្នុង​កិច្ច​ប្រជុំ​ផ្សព្វ​ផ្សាយ​ផែន​ការយុទ្ធសាស្ត្រស្តីពីការលើកកម្ពស់ការគ្រប់គ្រងរដ្ឋបាលដែនដី សន្តិសុខជាតិ សណ្តាប់​ធ្នាប់​សាធារណៈ និងសុវត្ថិភាពសង្គម ២០២៤-២០២៨ របស់ក្រសួងមហាផ្ទៃ នៅ​សាលា​រាជ​ធានីភ្នំពេញ នាព្រឹកថ្ងៃទី១៩ ខែមេសា ឆ្នាំ២០២៤ ក្រោមអធិបតីភាព ឯកឧត្តម​សន្តិ​បណ្ឌិត ម៉ៅ ច័ន្ទតារា រដ្ឋមន្ត្រីស្តីទីក្រសួងមហាផ្ទៃ ។

លោក ហ៊ុន សុរិទ្ធី លើកឡើងថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បាន​នឹង​កំពុង​យកចិត្តទុកដាក់ជាខ្លាំងលើវិស័យសន្តិសុខជាតិ សណ្តាប់ធ្នាប់សាធារណៈ និង​សុវត្ថិភាព​សង្គម ដែលជាវិស័យអាទិភាពមួយដ៏សំខាន់ គឺជាឆ្អឹងខ្នង​សម្រាប់​ទ្រទ្រង់​ការ​អភិវឌ្ឍ​សេដ្ឋកិច្ច​សង្គម ស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១។ ជាក់ស្តែង​ក្នុង​អំឡុង​ពេលរៀបចំការបោះឆ្នោតជ្រើសតាំងព្រឹទ្ធសភា អាណត្តិទី៥ ក៏ដូចជាពិធី​បុណ្យ​ចូល​ឆ្នាំ​ខ្មែរ​ប្រពៃណីជាតិ​កន្ល​ងទៅ​នេះមា​ន​ភ្ញៀវ​ទេសចរ​ចូលរួម​លេង​កម្សាន្ត សប្បាយ​ក្នុង​ព្រឹត្តិការណ៍​សង្ក្រាន្ត​នេះ​ប្រមាណ ១លាន ៣សែននាក់ និងភ្ញៀវទេសចរអន្តរជាតិជាង ១ម៉ឺន ៨ពាន់នាក់ ដែល​ញ៉ាំងឲ្យបរិយាកាសក្នុងព្រឹត្តិការណ៍សង្ក្រាន្តឆ្នាំថ្មី ប្រកបដោយបរិយាកាសសប្បាយរីករាយ អធិកអធម និងពោរពេញដោយក្តីមោទនភាពបំផុត។

លោក ហ៊ុន សុរិទ្ធី បន្តទៀតថា ផែនការយុទ្ធសាស្ត្រស្តីពីការ​លើក​កម្ពស់​ការ​គ្រប់​គ្រង​រដ្ឋបាល​ដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ២០២៤-២០២៨ របស់ក្រសួងមហាផ្ទៃដែលផ្សព្វផ្សាយនាពេលនេះ គឺជាយន្តការទិសដៅថ្មីបន្ថែមទៀត ដែល​ជា​ផែន​ទី​បង្ហាញ​ផ្លូវច្បាស់លាស់មួយទៀត សម្រាប់ការដឹកនាំ ការគ្រប់គ្រង និងការ​អនុវត្ត​កិច្ច​ការ​ជា​អាទិភាព សំដៅពង្រឹងការអនុវត្តមុខងាររបស់រដ្ឋបាលថ្នាក់ក្រោមជាតិ ជាពិសេស​ការ​ធ្វើ​ឲ្យ​មាន​សង្គតិភាព រវាងយន្តការគាំទ្រដោយក្រសួង-ស្ថាប័នថ្នាក់ជាតិ និងការអនុវត្តតួនាទី ភារកិច្ច​នៅ​ថ្នាក់​មូល​ដ្ឋានឲ្យកាន់តែមានប្រសិទ្ធភាព និងប្រសិទ្ធិផលខ្ពស់។

ឯកឧត្តមសន្តិបណ្ឌិត ម៉ៅ ច័ន្ទតារា មានប្រសាសន៍ថា យុទ្ធសាស្ត្របញ្ចកោណដំណាក់កាលទី១ សម្រាប់​កំណើន ការងារ សមធម៌ ប្រសិទ្ធភាព និងចីរភាព ដោយផ្តោតលើវិស័យអាទិភាពចំនួន៥ ពី​មនុស្ស ផ្លូវ ទឹក ភ្លើង និងបច្ចេកវិទ្យា ដើម្បីបន្ត​កសាង​មូល​ដ្ឋាន​គ្រឹះ​ឆ្ពោះទៅ​ស​ម្រេច​ចក្ខុ​វិស័យ​កម្ពុជា​ឆ្នាំ​២០៣០ ជាប្រទេសមានចំណូលមធ្យមកម្រិតខ្ពស់ និងឆ្នាំ២០៥០ ជាប្រទេសមាន​ចំណូល​ខ្ពស់​។ ដើម្បីធានាដល់ការ​បំពេញ​តួនាទី​ជា​សេនាធិការ​ជូន​រាជ​រដ្ឋាភិបាល​ប្រកប​ដោយ​ការ​ទទួល​ខុស​ត្រូវខ្ពស់ ក្រសួងមហាផ្ទៃបានរៀបចំ​ផែនការ​យុទ្ធសាស្ត្រ​ស្តីពីកា​រ​លើក​កម្ពស់​ការ​គ្រប់​គ្រង​រដ្ឋ​បាលដែនដី សន្តិសុខជាតិ សណ្តាប់ធ្នាប់សាធារណៈ និងសុវត្ថិភាពសង្គម ធ្វើជាផែនទី​បង្ហាញ​ផ្លូវ​ច្បាស់​លាស់មួយសម្រាប់អនុវត្តពីឆ្នាំ២០២៤ដល់ឆ្នាំ២០២៨ សំដៅចូលរួមចំណែក​អនុវ​ត្ត​យុទ្ធសាស្ត្របញ្ចកោណដំណាក់កាលទី១ឲ្យសម្រេចបានគោលដៅ គោលបំណង និង​ចក្ខុ​វិស័យ​ដែល​បាន​កំណត់​៕ អត្ថបទ ៖ ប្រាក់ វ៉ាន់ដា