កំពង់ឆ្នាំង៖ ក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការ នៃស្នងការដ្ឋាននគរបាលខេត្តកំពង់ឆ្នាំង នាព្រឹកថ្ងៃទី១៩ ខែមេសា ឆ្នាំ២០២៤នេះ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ តំណាងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានជំរុញអោយកងកម្លាំងនគរបាលនៅក្នុងស្នងការដ្ឋាននគរបាលខេត្តកំពង់ឆ្នាំងទាំងអស់ ចូលរួមការពារសន្តិសុខសណ្តាប់ធ្នាប់ជូនប្រជាពលរដ្ឋ និងសង្គមជាតិអោយបានល្អប្រសើរ ដើម្បីក្តីសុខសាន្តរបស់ប្រជាជនគ្រប់រូប។

 ឯកឧត្តមបានបន្តថា៖ ឯកឧត្តម មានការកោតសរសើរចំពោះកងកម្លាំងនគរបាលនៃស្នងការដ្ឋាននគរបាលខេត្តកំពង់ឆ្នាំង ដែលកន្លងមកបានខិតខំក្នុងការថែរក្សាសន្តិសុខសណ្តាប់ធ្នាប់នៅក្នុងខេត្តជូនប្រជាពលរដ្ឋបានល្អ សូម្បីនៅក្នុងសង្ក្រាន្តឆ្នាំថ្មីនៅខេត្តកំពង់ឆ្នាំងរយៈពេល៤ថ្ងៃ ក៏កងកម្លាំងនគរបាល បានខិតខំពុះពារការលំបាក ស៊ូនឹងកម្តៅថ្ងៃ ដើម្បីរក្សាអោយបាននូវសណ្តាប់ធ្នាប់ សន្តិសុខបានល្អ រួមទាំងមិនមានគ្រោះថ្នាក់ចរាចរណ៍កើតមានក្នុងខេត្តផងដែរ ក្នុងរយៈពេល៤ថ្ងៃនេះ។ ទោះបីយើងការពារបានល្អបែបនេះក្តី កងកម្លាំងនគរបាលទាំងអស់ ត្រូវខិតខំបន្តទៀតក្នុងការថែរក្សាសន្តិសុខសណ្តាប់ធ្នាប់នៅក្នុងខេត្តអោយបានរឹតតែល្អ ជូនប្រជាពលរដ្ឋ ថ្នាក់ដឹកនាំ និងសង្គមជាតិ ដើម្បីការអភិវឌ្ឍន៍លើគ្រប់វិស័យ។ ក្រៅពីការងាររក្សាសន្តិសុខសណ្តាប់ធ្នាប់នេះ កងកម្លាំងនគរបាល ត្រូវចូលរួមយ៉ាងសកម្មជាមួយប្រធានគណៈបញ្ជាការរដ្ឋបាលខេត្តកំពង់ឆ្នាំង ឯកឧត្តមព្រះរាជអាជ្ញាខេត្ត ក្នុងការបង្ក្រាបរាល់បទល្មើសគ្រឿងញៀន បទល្មើសឈូសបំផ្លាញទន្ទ្រានព្រៃលិចទឹក បទល្មើសល្បែងស៊ីសង បទល្មើសនេសាទគ្រប់ប្រភេទ និងបទល្មើសនានាអោយមានប្រសិទ្ធិភាព។

ក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការ នៃស្នងការដ្ឋាននគរបាលខេត្តកំពង់ឆ្នាំងនេះ គឺលោកឧត្តមសេនីយ៍ទោ តេង ចាន់ណាត ស្នងការនៃស្នងការដ្ឋាននគរបាលខេត្តសៀមរាប ត្រូវមកកាន់ជាស្នងការនៃស្នងការដ្ឋាននគរបាលខេត្តកំពង់ឆ្នាំង ហើយលោកឧត្តមសេនីយ៍ទោ ខូវ លី ស្នងការនៃស្នងការដ្ឋាននគរបាលខេត្តកំពង់ឆ្នាំង ត្រូវទៅកាន់ជាស្នងការ នៃស្នងការដ្ឋាននគរបាលខេត្តឧត្តមានជ័យវិញ ៕ ដោយ ៖ កាំង ហុងវាស្នា