នគរបាលអូស្ត្រាលី បាននិយាយនៅថ្ងៃសុក្រ (១៩ មេសា) នេះថា ក្មេងប្រុសអាយុ ១៦ ឆ្នាំម្នាក់ត្រូវបានចោទប្រកាន់ពីបទឧក្រិដ្ឋកម្មភេរវកម្ម ជុំវិញការចោទប្រកាន់ថាបានប្រើកាំបិតទចាក់សម្លាប់លើគណៈសង្ឈជាន់ខ្ពស់ (បុព្វជិត) របស់ព្រះវិហារ អាស៊ីរ៉េន (Assyrian) ក្នុងទីក្រុងស៊ីដនី អំឡុងពេលពិធីកម្មមួយ ខណៈដែលការស៊ើបអង្កេតបន្តទៅលើកុប្បកម្មបន្ទាប់ពីការវាយប្រហារនោះ។

នគរបាលមកពីក្រុមប្រឆាំងភេរវកម្មរួម បានសាកសួរបុរសវ័យជំទង់ដែលស្ថិតនៅក្នុងមន្ទីរពេទ្យក្រោមការយាមរបស់នគរបាលនោះ កាលពីថ្ងៃព្រហស្បតិ៍ ហើយបានចោទប្រកាន់គេពីបទប្រព្រឹត្តអំពើភេរវកម្ម។ បើត្រូវបានកាត់ទោស ក្មេងប្រុសនោះអាចជាប់ពន្ធនាគារអស់មួយជីវិត។

ស្នងការនគរបាលរដ្ឋ ញូវ សៅ វែលស៍ (New South Wales) លោកស្រី ខារិន វេប (Karen Webb) បាននិយាយថា ក្មេងប្រុសនោះត្រូវបានចោទប្រកាន់ថាប្រើកាំបិតចាក់លើបុព្វជិត ម៉ា ម៉ារី អ៊ីម៉ានូអែល (Mar Mari Emmanuel) ចំនួន ៦ ដង។ បុព្វជិត អ៊ីម៉ានូអែល នៅក្នុងសារជាសំឡេងនៅលើប្រព័ន្ធផ្សព្វផ្សាយសង្គមកាលពីថ្ងៃព្រហស្បតិ៍បានលើកឡើងថា ខ្លួនបានអត់ទោសឱ្យអ្នកវាយប្រហារនោះ។

ការប៉ះទង្គិចមួយបានផ្ទុះឡើងនៅខាងក្រៅវិហារភ្លាមៗបន្ទាប់ពីការវាយប្រហារ ខណៈហ្វូងមនុស្សដែលខឹងសម្បារបានទាមទារឱ្យប្រគល់អ្នកវាយប្រហារនោះទៅឱ្យពួកគេចាត់ការ។ មន្ត្រីនគរបាលជាង ៥០ នាក់បានរងរបួស និងរថយន្តនគរបាល ២០ គ្រឿងរងការខូចខាត ហើយនគរបាលកំពុងបន្តស៊ើបអង្កេត៕