រដ្ឋអាជ្ញា បាននិយាយកាលពីថ្ងៃព្រហស្បតិ៍ថា ក្រុមអ្នកស៊ើបអង្កេត បានចាប់ខ្លួនបុរសជនជាតិអាល្លឺម៉ង់-រុស្ស៊ីពីរនាក់ពីបទសង្ស័យថា បានធ្វើចារកម្មសម្រាប់ប្រទេសរុស្ស៊ី និងរៀបចំផែនការវាយប្រហារ នៅក្នុងប្រទេសអាល្លឺម៉ង់ រួមទាំងគោលដៅរបស់កងទ័ពសហរដ្ឋអាមេរិកផងដែរ ដើម្បីបំផ្លាញការគាំទ្រផ្នែកយោធាសម្រាប់អ៊ុយក្រែន។
រដ្ឋអាជ្ញាសហព័ន្ធ បាននិយាយនៅក្នុងសេចក្តីថ្លែងការណ៍មួយថា បុរសទាំងពីរ ត្រូវបានកំណត់អត្តសញ្ញាណថា ជា Dieter S. និង Alexander J. ត្រូវបានចាប់ខ្លួននៅទីក្រុង Bayreuth ក្នុងរដ្ឋបាវ៉ារៀ ( Bavaria) ភាគអាគ្នេយ៍ កាលពីថ្ងៃពុធ។
ជនជាប់ចោទសំខាន់ គឺលោក Dieter S. ត្រូវបានគេចោទប្រកាន់ថា បានស្វែងរកគោលដៅសំខាន់ៗ សម្រាប់ការវាយប្រហារ «រួមទាំងទីតាំងរបស់កងកម្លាំងប្រដាប់អាវុធអាមេរិក»ដែលឈរជើង នៅក្នុងប្រទេសអាល្លឺម៉ង់។
ឯកអគ្គរដ្ឋទូតរុស្ស៊ីប្រចាំទីក្រុងប៊ែរឡាំង ត្រូវបានក្រសួងការបរទេសកោះហៅ បន្ទាប់ពីការចាប់ខ្លួនបុរសទាំងពីរនោះ។
រដ្ឋមន្ត្រីការបរទេសអាល្លឺម៉ង់ លោកស្រី អានណាឡេណា បែបក់ (Annalena Baerbock) បាននិយាយជាបន្តបន្ទាប់នៅលើបណ្តាញសង្គម X ថា អាល្លឺម៉ង់ នឹងមិនអនុញ្ញាតឲ្យលោកពូទីនបង្កការខ្លាច នៅក្នុង ប្រទេសនេះទេ។
ប៉ុន្តែមន្ត្រីរុស្ស៊ី បានច្រានចោលការចោទប្រកាន់ទាំងនេះ។
ស្ថានទូតរុស្ស៊ីប្រចាំនៅទីក្រុងប៊ែរឡាំង បាននិយាយក្នុងសារបង្ហោះនៅលើបណ្តាញសង្គម X ថា៖«មិនមានភ័ស្តុតាង ត្រូវបានបង្ហាញដើម្បីបញ្ជាក់ផែនការរបស់អ្នកជាប់ឃុំ ឬលទ្ធភាពទំនាក់ទំនងរបស់ពួកគេទៅនឹងក្រុមតំណាងនៃរចនាសម្ព័ន្ធរបស់រុស្ស៊ីទេ»។