ក្រុមឃ្លាំមើលនុយក្លេអ៊ែររបស់អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី១៨ ខែមេសា) បាននិយាយថា មន្ត្រីប្រចាំនៅឯរោងចក្រថាមពលនុយក្លេអ៊ែរ Zaporizhzhia របស់អ៊ុយក្រែន ដែលត្រូវបានរុស្ស៊ីគ្រប់គ្រង បានរាយការណ៍ពីការប៉ុនប៉ងវាយប្រហារដោយយានដ្រូនជាថ្មីលើមជ្ឈមណ្ឌលហ្វឹកហ្វឺនរបស់រោងចក្រនេះ ពោលគឺមានរយៈពេលមិនដល់ ២សប្តាហ៍ផង បន្ទាប់ពីមានឧប្បត្តិហេតុស្រដៀងគ្នាមួយផ្សេងទៀត។
មន្ត្រីដែលជ្រើសរើសដោយរុស្ស៊ី ប្រចាំនៅរោងចក្រ ដែលជារោងចក្រនុយក្លេអ៊ែរដ៏ធំបំផុតនៅអឺរ៉ុបនោះ បាននិយាយថា អ៊ុយក្រែនជាអ្នកនៅពីក្រោយឧបទ្ទវហេតុចុងក្រោយនេះ។ គួរបញ្ជាក់ថា កងកម្លាំងរុស្ស៊ីបានកាន់កាប់រោងចក្រនេះក្នុងសប្តាហ៍ដំបូងនៃការលុកលុយលើអ៊ុយក្រែន កាលពីខែកុម្ភៈ ឆ្នាំ២០២២ ហើយចាប់តាំងពីពេលនោះមកភាគីនីមួយៗ បានចោទប្រកាន់គ្នាទៅវិញទៅមកថា បានវាយប្រហាររោងចក្រនេះ។
លោក Rafael Grossi អគ្គនាយកទីភ្នាក់ងារថាមពលអាតូមិកអន្តរជាតិ (IAEA) បានព្រមានថា ការវាយប្រហារ និងឧបទ្ទវហេតុនៅរោងចក្រនេះ គឺជាទង្វើ «មិនទទួលខុសត្រូវ» ហើយអាចបង្កឲ្យមានគ្រោះថ្នាក់នុយក្លេអ៊ែរដ៏ធំមួយ។
លោក Grossi បាននិយាយថា ហេតុការណ៍ចុងក្រោយនេះមិនបណ្តាលឲ្យមានការខូចខាត ឬរបួសនោះទេ។ ហើយលោកបានឲ្យដឹងនៅក្នុងសេចក្តីថ្លែងការណ៍ថា អ្នកឃ្លាំមើលរបស់ IAEA ដែលឈរជើងប្រចាំនៅរោងចក្រថាមពលនោះ បានឮការផ្ទុះមួយក្នុងពេលតែមួយ ខណៈដែលក្រុមមន្ត្រីជ្រើសរើសដោយរុស្ស៊ី បានរាយការណ៍ពីការប៉ុនប៉ងវាយប្រហារដោយយានដ្រូនរបស់អ៊ុយក្រែន។ លោក Grossi បានប្រាប់ថា៖ «ប្រសិនបើត្រូវបានបញ្ជាក់ថា ពិត វានឹងក្លាយជាការវិវត្តន៍មួយដ៏គួរឲ្យព្រួយបារម្ភយ៉ាងខ្លាំង»។
មិនទាន់មានការអត្ថាធិប្បាយភ្លាមៗអំពីរបាយការណ៍ចុងក្រោយរបស់មន្ត្រីអ៊ុយក្រែននៅឡើយទេ។ តែយ៉ាងណាក្ដី ទីក្រុងគីវ បានបដិសេធរាល់ការទាក់ទងនឹងឧប្បត្តិហេតុមុនៗ ហើយបានលើកឡើងថា ជនជាតិរុស្ស៊ីប្រហែលជាបានរៀបចំឲ្យមានហេតុការណ៍នេះឡើង៕