ឯកអគ្គរដ្ឋទូតអាមេរិកប្រចាំអង្គការសហប្រជាជាតិ (UN) គឺលោកស្រី Linda Thomas-Greenfield នៅថ្ងៃសុក្រ (ទី១៩ ខែមេសា) នេះ បាននិយាយថា លោកស្រីសង្ឃឹមថា នឹងស្វែងរកវិធីថ្មី ដើម្បីធានាឲ្យបាននូវការអនុវត្តទណ្ឌកម្មលើកូរ៉េខាងជើងត្រឹមខែឧសភា បន្ទាប់ពីរុស្ស៊ី និងចិន រារាំងដល់ការចាប់ផ្ដើមឡើងវិញនូវសកម្មភាពត្រួតពិនិត្យ។
លោកស្រី Thomas-Greenfield បាននិយាយថា ទីក្រុងវ៉ាស៊ីនតោន និងសម្ព័ន្ធមិត្ត កំពុងសម្លឹងមើលជម្រើសជាច្រើន ទាំងនៅក្នុង និងក្រៅ UN ដើម្បីយកមកជំនួសក្រុមអ្នកជំនាញដែលបង្កើតឡើងរយៈពេលជាង ១៥ឆ្នាំហើយ ពោលគឺជាក្រុមត្រួតពិនិត្យការអនុវត្តទណ្ឌកម្ម ដែលមានគោលបំណងទប់ស្កាត់កម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។
គួរបញ្ជាក់ថា រុស្ស៊ីបានច្រានចោលការចាប់ផ្ដើមឡើងវិញប្រចាំឆ្នាំរបស់ក្រុមប្រឹក្សាភិបាល កាលពីខែមីនា ខណៈដែលប្រទេសចិនបានចៀសវាងការបោះឆ្នោត។
នៅពេលត្រូវបានសួរថា តើសហរដ្ឋអាមេរិក និងសម្ព័ន្ធមិត្ត អាចបង្កើតជម្រើសផ្សេងបានទេ នៅពេលដែលអាណត្តិរបស់ក្រុមប្រឹក្សាបច្ចុប្បន្នត្រូវផុតនៅចុងខែមេសានោះ លោកស្រី Thomas-Greenfield បានបានប្រាប់អ្នកសារព័ត៌មាននៅទីក្រុងតូក្យូថា៖ «នោះជារឿងដ៏ប្រសើរបំផុត ក្នុងការចាប់ផ្តើមនៅខែក្រោយ។ ខ្ញុំមិនដឹងថា យើងនឹងធ្វើរឿងនោះបានលឿនកម្រិតណានោះទេ។ ប៉ុន្តែនោះជាក្តីសង្ឃឹមរបស់ខ្ញុំ»។
ហើយលោកស្រីបានបន្ថែមថា៖ «ប្រហែលជាមិនមានជម្រើសតែមួយនោះទេ។ យើងអាចនឹងសម្លឹងមើលជម្រើស ២ ឬក៏៣ ផ្សេងគ្នា ដែលនឹងធ្វើឲ្យយើងទទួលបានព័ត៌មានដែលយើងត្រូវការ»៕