ប្រភពជាច្រើនបានឲ្យដឹងថា អ៊ីស្រាអែលបានធ្វើការវាយប្រហារលើដែនដីអ៊ីរ៉ង់ នៅថ្ងៃសុក្រ (ទី១៩ ខែមេសា) នេះ ពោលគឺកើតឡើងប៉ុន្មានថ្ងៃបន្ទាប់ពីអ៊ីរ៉ង់បានវាយប្រហារអ៊ីស្រាអែលស្រោចដូចទឹកភ្លៀង ដោយយានដ្រូន និងមីស៊ីល។ ហើយបន្ទាប់ពីមានការវាយប្រហារឆ្លើយតបវិញរបស់យោធាអ៊ីស្រាអែលនេះ បង្កឲ្យមានប្រតិកម្មជាច្រើនពីបណ្ដាឥស្សរជន ជុំវិញពិភពលោក ដោយអ្នកខ្លះចេញសេចក្តីថ្លែងការណ៍ផ្លូវការ ហើយខ្លះទៀតបង្ហោះសារលើបណ្តាញសង្គម។
ជាដំបូងគេ រដ្ឋមន្ត្រីសន្តិសុខប្រកាន់ស្ដាំយ៉ាងតឹងរ៉ឹងរបស់អ៊ីស្រាអែល លោក Itamar Ben-Gvir បានបង្ហោះសារនៅលើបណ្ដាញសង្គម X យ៉ាងខ្លីថា៖ «មិនគួរឲ្យជឿ»។ ចំណែកប្រធានគណៈកម្មការអឺរ៉ុប លោកស្រី Ursula von der Leyen បានលើកឡើងថា៖ «វាពិតជាចាំបាច់ណាស់ដែលតំបន់នៅតែមានស្ថិរភាព ហើយភាគីទាំងអស់ត្រូវអត់ធ្មត់កុំធ្វើសកម្មភាពបន្ថែមទៀត»។
អនុរដ្ឋមន្ត្រីការបរទេសបារាំងលោក Jean-Noel Barrot បាននិយាយថា៖ «អ្វីដែលខ្ញុំអាចនិយាយបាន គឺថា ជំហររបស់បារាំង គឺអំពាវនាវដល់តួអង្គទាំងអស់ឲ្យបន្ថយការកើនឡើងនូវជម្លោះ និងអត់ធ្មត់»។ ហើយលោក Ben Saul អ្នករាយការណ៍ពិសេសរបស់អង្គការសហប្រជាជាតិស្តីពីការប្រឆាំងភេរវកម្ម និងសិទ្ធិមនុស្ស បានបញ្ចេញប្រតិកម្មថា៖ «ការវាយប្រហារចុងក្រោយរបស់អ៊ីស្រាអែលលើអ៊ីរ៉ង់ គឺជាការបំពានមួយផ្សេងទៀតនៃការហាមឃាត់លើការប្រើប្រាស់កម្លាំងយោធា ក្រោមច្បាប់អន្តរជាតិ និងធម្មនុញ្ញអង្គការសហប្រជាជាតិ និងគំរាមកំហែងដល់សិទ្ធិមនុស្សក្នុងការរស់រានមានជីវិត»។
រីឯអគ្គលេខាធិការគណៈរដ្ឋមន្ត្រីជប៉ុនលោក Yoshimasa Hayashi បាននិយាយថា៖ «ប្រទេសជប៉ុនមានការព្រួយបារម្ភយ៉ាងខ្លាំង ចំពោះស្ថានការណ៍ នៅមជ្ឈិមបូព៌ា ហើយថ្កោលទោសយ៉ាងដាច់អហង្ការ ចំពោះសកម្មភាពណាមួយដែលនាំឲ្យស្ថានការណ៍អរិភាពកាន់តែកើនឡើង។ ជប៉ុននឹងបន្តខិតខំប្រឹងប្រែងផ្នែកការទូតចាំបាច់ទាំងអស់ ដើម្បីការពារស្ថានភាពកុំឲ្យកាន់តែអាក្រក់ទៅៗ»។
ដោយឡែកអ្នកនាំពាក្យក្រសួងការបរទេសចិន បានប្រាប់ថា៖ «ចិនប្រឆាំងរាល់សកម្មភាពដែលបង្កើនភាពតានតឹងនៅមជ្ឈិមបូព៌ា ក្រោយមានការវាយប្រហាររបស់អ៊ីស្រាអែលលើអ៊ីរ៉ង់»៕