កងកម្លាំងអ៊ុយក្រែន បានវាយប្រហារលើមូលដ្ឋានទ័ពអាកាសរុស្ស៊ីដ៏ធំមួយ នៅលើឧបទ្វីបគ្រីម៉េដែលទីក្រុងមូស្គូ បានបញ្ចូលជាឧបសម្ព័ន្ធរបស់ខ្លួន ដោយបានបំផ្លាញគ្រឿងយុទ្ធោបករណ៍យ៉ាងច្រើន។
ទីភ្នាក់ងារចារកម្មយោធារបស់ប្រទេសអ៊ុយក្រែន បាននិយាយកាលពីថ្ងៃព្រហស្បតិ៍ថា ការវាយប្រហារនេះបានធ្វើឲ្យខូចខាតយ៉ាងធ្ងន់ធ្ងរនូវជើងទម្របាញ់មីស៊ីលចំនួន៤ ស្ថានីយរ៉ាដាចំនួនបី និងឧបករណ៍ផ្សេងទៀត។
ទីភ្នាក់ងារនេះ បាននិយាយបន្ទាប់ពីបានប្រកាសប្រតិបត្តិការ «ជោគជ័យ» ថា «សម្ភារៈអាកាសចរណ៍មួយចំនួនរបស់សត្រូវ ត្រូវបានបំផ្លាញ ឬខូចខាត ហើយចំនួនអ្នកស្លាប់ និងរបួសក្នុងចំណោមបុគ្គលិកនៃកងទ័ពកាន់កាប់រុស្ស៊ី កំពុងត្រូវបានបញ្ជាក់ឲ្យច្បាស់លាស់»។
ការវាយប្រហារនេះ បានកើតឡើងនៅព្រឹកព្រលឹមថ្ងៃពុធ នៅឯមូលដ្ឋានទ័ពអាកាស Dzhankoi នៅភាគខាងជើងនៃឧបទ្វីបដែលកាន់កាប់ដោយទីក្រុងមូស្គូ ក្នុងឆ្នាំ ២០១៤។
លោក វ៉ូឡូមៀ ហ្សេឡិនស្គី (Volodymyr Zelensky) ប្រធានាធិបតីអ៊ុយក្រែន បានថ្លែងអំណរគុណដល់មេបញ្ជាការយោធាជាន់ខ្ពស់របស់ខ្លួនចំពោះអ្វីដែលលោកហៅថា «ការវាយប្រហារត្រឹមត្រូវប្រឆាំងនឹងអ្នកកាន់កាប់នោះ»។