យោងតាមរបាយការណ៍ថ្មីមួយ ក្រសួងការបរទេសអាមេរិក បានបរាជ័យក្នុងការធ្វើសកម្មភាពលើរបាយការណ៍ផ្ទៃក្នុងនៃការរំលោភសិទ្ធិមនុស្សដោយអង្គភាពយោធា និងនគរបាលអ៊ីស្រាអែល ដោយបង្កើតជាសំណួរថ្មីអំពីថាតើការបន្តផ្គត់ផ្គង់អាវុធរបស់ទីក្រុងវ៉ាស៊ីនតោនដល់អ៊ីស្រាអែល កំពុងបំពានច្បាប់របស់សហរដ្ឋអាមេរិកដែរឬទេ?

គេហទំព័រសារព័ត៌មានស៊ើបអង្កេត Pro Publica បានដកស្រង់សម្តីមន្ត្រី ដោយនិយាយថា គណៈកម្មាការពិសេសដែលបង្កើតឡើងដោយរដ្ឋបាលលោកបៃដិន បានផ្តល់អនុសាសន៍ថា អង្គភាពយោធានិងនគរបាលអ៊ីស្រាអែលជាច្រើន ត្រូវបានបដិសេធការផ្តល់មូលនិធិពីសហរដ្ឋអាមេរិក ដោយសារតែការរំលោភសិទ្ធិមនុស្សធ្ងន់ធ្ងរ។ ប៉ុន្តែក្រសួងការបរទេស នៅមិនទាន់ចាត់ការតាមអនុសាសន៍នោះទេ។

ឧប្បត្តិហេតុពាក់ព័ន្ធនឹងការរំលោភបំពានដែលត្រូវបានចោទប្រកាន់ ភាគច្រើនបានកើតឡើងនៅតំបន់វេសបែង (West Bank) មុនពេលការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលា និងការផ្ទុះឡើងនៃសង្រ្គាមហ្កាហ្សា។ ពួកគេរាប់បញ្ចូលទាំងការសម្លាប់ក្រៅប្រព័ន្ធតុលាការដោយនគរបាលព្រំដែន ជាករណីមួយដែលបុរសជនជាតិអាមេរិកដើមកំណើតប៉ាឡេស្ទីនវ័យចំណាស់ម្នាក់ ត្រូវបានដាក់ខ្នោះ ហើយទុកឲ្យស្លាប់ និងការចោទប្រកាន់ថា អ្នកសួរចម្លើយបានធ្វើទារុណកម្ម និងចាប់រំលោភក្មេងជំទង់ម្នាក់ដែលត្រូវបានចោទប្រកាន់ពីបទគប់ដុំថ្ម និងដបដែលផ្ទុកសារធាតុបណ្តាលឲ្យផ្ទុះឆេះ។