​អូឡាំពិក៖ ​កីឡា​ការិនី Hidilyn Diaz បាន​ជម្នះ​រហូត​ទទួល​បាន​មេដាយ​មាស​លើ​វិញ្ញាសា​លើក​ទម្ងន់​ផ្នែក​នារី​ទម្ងន់ ៥៥​គីឡូក្រាម ដែល​ជា​មេដាយ​មាស​អូឡាំពិក​លើកដំបូង​សំរាប់​ហ្វីលីពីន​។ ​Diaz ធ្វើ​បាន​ល្អ​ជាង​កីឡា​ការិនី​ចិន Liao Qiuyun ក្នុង​ការ​លើក​ចុង​ក្រោយ​ដែល​មាន​ទម្ងន់​សរុប ២២៤​គីឡូក្រាម។​

​​មុន​នេះ​ចិន​បាន​ត្រកង​យក​មេដាយ​មាស​ ៣​វិញ្ញាសា​មក​ហើយ​ក្នុង​ប្រភេទ​កីឡា​លើក​ទម្ងន់​នេះ ខណៈ​កីឡា​ការិនី​ចិន​ដែល​បាន​មេដាយ​ប្រាក់ Liao Qiuyun នៅតែ​កាន់​កំណត់ត្រា​ពិភពលោក​លើក​បាន​ទម្ងន់ ២២៧​គីឡូក្រាម​ដដែល​។ ​ចំណែក​មេដាយ​សំរឹទ្ធ​ក្នុង​វិញ្ញាសា​នេះ​បាន​ទៅ កីឡា​ការិនី​កា​ហ្សា​ក់​ស្ថាន Zulfiya Chinshanlo ក្រោយ​លើក​បាន ២១៣​គ​។ ​​ងាក​មក​ការប្រកួត​កីឡាវាយកូនឃ្លីលើតុ​វិញ្ញាសា​វាយ​គូ​ចម្រុះ ជប៉ុន​បាន​យកឈ្នះ​ចិន​គួរ​ឱ្យ​ភ្ញាក់​ផ្អើល​លើ​ប្រភេទ​កីឡា​មួយ​នេះ​ដោយ​ដៃគូ Jun Mizutani និង Mima Ito យកឈ្នះ​ដៃគូ​ចិន Xu Xun និង Liu Shiwen​។ រំលឹក​កាលពី​អូឡាំពិក​ទីក្រុង Rio ឆ្នាំ២០១៦ ចិន​បាន​យកឈ្នះ​មេដាយ​គ្រប់​វិញ្ញាសា​ទាំង​អស់​លើ​ប្រភេទ​កីឡាវាយកូនឃ្លីលើតុ​នេះ​។​

​​មក​ទស្សន​វិញ្ញាសា​កីឡា​តៃ​ក្វាន់​ដូ កីឡា​ការិនី​ក្រុ​អាស៊ី Matea Jelic ដណ្តើមបាន​មេដាយមាស​លើកដំបូង​ឱ្យ​ក្រូ​អាស៊ី​នៅ​អូឡាំពិក​ទីក្រុង​តូ​ក្យូ​នេះ​ ដោយ​យកឈ្នះ​កីឡាការិនី​ចក្រភព​អង់​គ្លេស Lauren Williams ២៥-២១ ក្នុង​ប្រភេទ​ទំងន់ ៦៧​គីឡូក្រាមនៅ​វគ្គ​ផ្តាច់ព្រ័ត្រ​។ ​​កីឡាការិនី​អេ​ហ្ស៊ីប Hedaya Malak និងកីឡាការិនី​កូ​ឌី​វ័រ Ruth Ghabi ទទួលបាន​មេដាយសំរឹទ្ធ​។ ចំណែក​ការប្រកួត​ផ្នែក​បុរស កីឡាករ​រុស្ស៊ី Maksim Khramtcov ដណ្តើមបាន​មេដាយមាស​លើ​ប្រភេទ​ទំងន់ ៨០​គីឡូក្រាម ក្រោយ​យកឈ្នះ​កីឡាករ​ហ្សកដានី Saleh El-Sharabaty ២០-៩ នៅ​វគ្គ​ផ្តាច់ព្រ័ត្រ តែ​ខាង​រុស្ស៊ី​ក្រោយមក​ក៏បាន​ប្រាប់ថា Maksim Khramtcov មាន​របួស​ដល់​បាក់ដៃ​ស្តាំ​។​ ​​រីឯ El-Sharabaty ដែល​បាន​មេដាយប្រាក់​នោះគឺជា​មេដាយ​ទី​២ ​ប៉ុណ្ណោះ​ក្នុង​ប្រវត្តិសាស្ត្រ​អូឡាំពិក​របស់ហ្សកដានី បន្ទាប់ពី​មេដាយ​ទី១ ​ធ្វើបាន​កាលពី​អូឡាំពិក​ឆ្នាំ២០១៦ ដោយ Ahmad Abughaush ឈ្នះ​មេដាយមាស​៕

​អត្ថបទ​៖​នាង សុភា​វុ​ធ