ប្រទេសចិន នៅថ្ងៃសុក្រ (ទី១៩ ខែមេសា) នេះ បានថ្កោលទោសចំពោះសំណើរបស់ប្រធានាធិបតីអាមេរិក លោក Joe Biden ដែលចង់ឲ្យមានការដំឡើងពន្ធកាន់តែខ្ពស់លើផលិតផលដែក និងអាលុយមីញ៉ូមរបស់ចិន ដោយនិយាយថា ប្រទេសចិន «មិនពេញចិត្តយ៉ាងខ្លាំង» ចំពោះការស្នើបែបនេះ។

អំឡុងពេលធ្វើដំណើរទៅកាន់រដ្ឋសមរភូមិ Pennsylvania កាលពីថ្ងៃពុធ (១៧ មេសា) លោក Biden បានអំពាវនាវឲ្យរដ្ឋបាលរបស់លោកបង្កើនសម្ពាធលើឧស្សាហកម្មដែកថែបរបស់ចិន ដែលជាផ្នែកមួយនៃរបៀបវារៈនៃការប្រកួតប្រជែងផ្នែកសេដ្ឋកិច្ចរបស់លោក នៅទីក្រុង Pittsburgh ដែលជាមជ្ឈមណ្ឌលដ៏ធំនៃឧស្សាហកម្មដែកថែបអាមេរិក។

ដោយនិយាយពីទីស្នាក់ការកណ្តាលរបស់សហជីព United Steelworkers លោក Biden បានជំរុញឲ្យតំណាងពាណិជ្ជកម្មសហរដ្ឋអាមេរិក លោកស្រី Katherine Tai «ពិចារណាបង្កើនដល់ទៅ ៣ដង» នៃអត្រាពន្ធ ៧,៥ភាគរយ ដែលមានស្រាប់លើដែកថែប និងអាលុយមីញ៉ូមរបស់ចិន តាមរយៈការពិនិត្យឡើងវិញនៃអត្រាពន្ធកថាខណ្ឌទី៣០១ ដោយរង់ចាំការសន្និដ្ឋាននៃការពិនិត្យឡើងវិញរយៈពេល ៤ឆ្នាំ។

ពាក់ព័ន្ធនឹងសំណើដំឡើងពន្ធនេះ អ្នកនាំពាក្យក្រសួងការបរទេសចិន លោក Lin Jian បានអំពាវនាវឲ្យសហរដ្ឋអាមេរិកបញ្ឈប់ប្រើប្រាស់បញ្ហាពាក់ព័ន្ធនឹងប្រទេសចិន ក្នុងឆ្នាំបោះឆ្នោតនេះ ហើយបានបន្ថែមថា ប្រទេសចិននឹងចាត់វិធានការចាំបាច់ទាំងអស់ ដើម្បីការពារសិទ្ធិ និងផលប្រយោជន៍ផ្ទាល់ខ្លួន៕