ឥណ្ឌា៖ ក្រុមអ្នកជួយសង្គ្រោះបានដើរកាត់ល្បាប់ជម្រៅត្រឹមចង្កេះ នៅភាគខាងលិចប្រទេសឥណ្ឌាកាលពីថ្ងៃចន្ទ ទី២៦ ខែកក្កដាដើម្បីទៅដល់ប្រជាជនដែលរងរបួស និងចាប់ផ្ដើមសម្អាត ខណៈចំនួនអ្នកស្លាប់ដោយសារបំណាក់ដីបង្កឡើងដោយភ្លៀងរដូវមូសុង និងទឹកជំនន់ឡើងដល់ ១៩៨នាក់។
នៅក្នុងរដ្ឋដែលរងគ្រោះខ្លាំងជាងគេគឺរដ្ឋ Maharashtra ក្រុមអ្នកជួយសង្គ្រោះបានបញ្ឈប់ប្រតិបត្តិការស្វែងរកនៅក្នុងភូមិភ្នំ Taliye ភាគអាគ្នេយ៍នៃទីក្រុង Mumbai ដែលមានសាកសព ៥៣នាក់ត្រូវបានរកឃើញ។ ក្រុមអាជ្ញាធរមូលដ្ឋានបាននិយាយថា កិច្ចប្រឹងប្រែងដើម្បីរកសាកសពមនុស្ស ៣១នាក់ផ្សេងទៀតដែលកំពុងបាត់ខ្លួន បន្ទាប់ពីបំណាក់ដីដ៏ធំមួយបានបំផ្លាញផ្ទះរាប់សិបខ្នងកាលពីថ្ងៃព្រហស្បតិ៍នឹងត្រូវបញ្ចប់ បន្ទាប់ពីគ្រប់ឈ្មោះរបស់ពួកគេត្រូវបានរាប់ក្នុងចំណោមអ្នកស្លាប់។
ឆ្នេរសមុទ្រភាគខាងលិចរបស់ប្រទេសឥណ្ឌា ត្រូវបានវាយប្រហារដោយព្យុះភ្លៀងយ៉ាងខ្លាំងក្នុងរយៈពេលជាច្រើនថ្ងៃ ដោយប្រជាជនរាប់សែននាក់ត្រូវបានជម្លៀសចេញពីផ្ទះរបស់ពួកគេ នៅក្នុងរដ្ឋចំនួន ៣ និងមានការដាច់ចរន្តអគ្គិសនីនៅទូទាំងតំបន់ធំៗ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
