យោងតាមរបាយការណ៍ប្រព័ន្ធផ្សព្វផ្សាយជាច្រើនបានរាយការណ៍ថា ការវាយឆ្មក់របស់អ៊ីស្រាអែលនៅក្នុងទីក្រុង Tulkarm តំបន់កាន់កាប់ West bank ដែលបានចាប់ផ្តើមតាំងពីថ្ងៃព្រហស្បតិ៍ បានបន្តរហូតដល់យប់ថ្ងៃសុក្រ ជាកន្លែងដែលចំនួនអ្នកស្លាប់បានកើនឡើងដល់ ៥នាក់ និងយ៉ាងហោចណាស់ម្នាក់បានរងរបួស។
សារព័ត៌មាន Reuters បានរាយការណ៍ថា រហូតមកដល់យប់ថ្ងៃសុក្រ រថយន្តគិលានសង្គ្រោះជាច្រើនគ្រឿងនៅតែត្រូវបានរារាំងមិនឱ្យចូលទៅដល់ទីតាំងវាយឆ្មក់ ដើម្បីផ្តល់ជំនួយផ្នែកវេជ្ជសាស្រ្តដល់អ្នកដែលត្រូវការឡើយ។ អំពើហឹង្សានៅតំបន់ West Bank បានកើនឡើងរួចទៅហើយ មុនពេលការវាយលុករបស់អ៊ីស្រាអែលលើតំបន់ហ្កាហ្សា ដែលបានចាប់ផ្តើមក្រោយការវាយប្រហារកាលពីថ្ងៃទី៧ ខែតុលា ដឹកនាំដោយក្រុមហាម៉ាស លើអ៊ីស្រាអែលភាគខាងត្បូង។
ជម្លោះកាន់តែរីកធំចាប់តាំងពីពេលនោះមក ដោយមានការវាយឆ្មក់របស់យោធាអ៊ីស្រាអែលកាន់តែខ្លាំងឡើង អំពើហិង្សារបស់អ្នកតាំងលំនៅ និងការវាយប្រហារតាមដងផ្លូវរបស់ប៉ាឡេស្ទីន។
បន្ថែមលើជនជាតិប៉ាឡេស្ទីនជាង ៣៣.០០០នាក់ដែលត្រូវបានសម្លាប់ដោយអ៊ីស្រាអែលនៅតំបន់ហ្កាហ្សា បើយោងតាមអាជ្ញាធរគ្រប់គ្រងដោយក្រុមហាម៉ាស ក្រសួងសុខាភិបាលប៉ាឡេស្ទីនបាននិយាយថាយ៉ាងហោចណាស់មនុស្ស ៤៦៦នាក់នៅតំបន់ West Bank ត្រូវបានសម្លាប់ដោយកងកម្លាំងអ៊ីស្រាអែលឬអ្នកតាំងលំនៅដែលក្នុងចំណោមពួកគេជាអ្នកប្រយុទ្ធប្រដាប់អាវុធ។
ក្នុងអំឡុងពេលដូចគ្នានេះ យ៉ាងហោចណាស់ជនជាតិអ៊ីស្រាអែល១៣នាក់ រួមទាំងសមាជិកកងកម្លាំងសន្តិសុខរបស់អ៊ីស្រាអែលពីរនាក់ ត្រូវបានសម្លាប់ដោយជនជាតិប៉ាឡេស្ទីននៅតំបន់ West Bank នេះបើយោងតាមតួលេខរបស់អ៊ីស្រាអែល។
តំបន់ West Bank ស្ថិតក្នុងចំណោមទឹកដីដែលអ៊ីស្រាអែលបានចូលកាន់កាប់នៅក្នុងសង្រ្គាមមជ្ឈិមបូព៌ាឆ្នាំ ១៩៦៧ និងជាកន្លែងដែលប៉ាឡេស្ទីន មានបំណងជាយូរមកហើយដើម្បីបង្កើតរដ្ឋឯករាជ្យមួយ ដែលនឹងរួមបញ្ចូលទាំងតំបន់ហ្កាហ្សា និងទីក្រុងហ្សេរុយសាឡឹមខាងកើត ជារដ្ឋធានីរបស់ខ្លួន។