ការបំផ្ទុះជាច្រើន ត្រូវបានលាន់លឺនៅជុំវិញទីក្រុងប្រទេសអ៊ីរ៉ង់ កាលពីថ្ងៃសុក្រ ជាអ្វីដែលប្រភពព័ត៌មាននានា បាននិយាយថា ជាការវាយប្រហាររបស់អ៊ីស្រាអែល ប៉ុន្តែទីក្រុងតេអេរ៉ង់ បាននិយាយសម្រាលអំពីឧបទ្ទវហេតុនេះ ហើយបានបញ្ជាក់ថា អ៊ីរ៉ង់ពុំមានផែនការសម្រាប់ការសងសឹកនោះទេ ជាការឆ្លើយតបដែលបង្ហាញឆ្ពោះទៅរកការបញ្ចៀសសង្គ្រាមនៅទូទាំងតំបន់។ 

រដ្ឋមន្ត្រីការបរទេសអ៊ីរ៉ង់ បាននិយាយថា យានដ្រូន ដែលប្រភពបាននិយាយថា អ៊ីស្រាអែល បានបង្ហោះទៅលើទីក្រុង Isfahan គឺជាយានដ្រូនខ្នាតតូច ដែលយានដ្រូនទាំងនេះពុំបានបណ្តាលឱ្យមានការខូចខាត ឬរងរបួសនរណាម្នាក់នោះទេ។

ទំហំនៃការវាយប្រហារត្រូវបានកំណត់ ហើយការឆ្លើយតបដោយស្ងាត់ស្ងៀមរបស់អ៊ីរ៉ង់ ទំនងជាបង្ហាញសញ្ញានៃកិច្ចប្រឹងប្រែងដោយជោគជ័យដោយក្រុមអ្នកការទូត ជាអ្នកដែលបាននិងកំពុងធ្វើការដើម្បីបញ្ចៀសសង្គ្រាមចាប់តាំងពីការវាយប្រហារដោយយានដ្រូននិងមីស៊ីលរបស់អ៊ីរ៉ង់ ទៅលើប្រទេសអ៊ីស្រាអែល កាលពីថ្ងៃសៅរ៍។

ប្រព័ន្ធផ្សព្វផ្សាយ និងមន្ត្រីអ៊ីរ៉ង់ បានពណ៌នាអំពីការផ្ទុះមួយចំនួនក្នុងទ្រង់ទ្រាយតូចៗ ដែលពួកគេបាននិយាយថា បណ្តាលមកពីប្រព័ន្ធការពារដែនអាកាស វាយប្រហារលើយានដ្រូនចំនួន៣ គ្រឿងនៅលើទីក្រុង Isfahan ភាគកណ្តាលប្រទេសអ៊ីរ៉ង់។

ពួកគេបាននិយាយសំដៅទៅលើឧប្បត្តិហេតុនេះ ថាជាការវាយប្រហារដោយជនបង្កប់ ជាជាងធ្វើឡើងដោយអ៊ីស្រាអែល ដោយធ្វើឱ្យមានភាពចាំបាច់សម្រាប់ការសងសឹក ប៉ុន្តែមន្ត្រីជាន់ខ្ពស់អ៊ីរ៉ង់បាននិយាយទៅកាន់សារព័ត៌មាន Reuters ថា ពុំមានផែនការឆ្លើយតបទៅអ៊ីស្រាអែលចំពោះឧបទ្ទវហេតុនេះទេ។