ប្រជាជនក្នុងទីក្រុងតេអេរ៉ង់ ប្រទេសអ៊ីរ៉ង់ បានចេញធ្វើបាតុកម្ម បន្ទាប់ពីការបួងសួងកាលពីថ្ងៃសុក្រ ដើម្បីឆ្លើយតបទៅនឹងការវាយប្រហាររបស់អ៊ីស្រាអែល លើប្រទេសអ៊ីរ៉ង់។
ទោះជាយ៉ាងណា ដោយនិយាយនៅមុនពេលការបួងសួងកាលពីថ្ងៃសុក្រនៅទីក្រុងតេអេរ៉ង់ មេបញ្ជាការកងកម្លាំងជើងគោករបស់កងទ័ពអ៊ីរ៉ង់ លោក គីវម៉ាស ហេដារី(Kiumars Heydari) បាននិយាយថា របបជ្វីស គួរតែដឹងថា ប្រសិនបើខ្លួនធ្វើឲ្យមានកំហុស ពេលនេះនឹងត្រូវបានដាក់ទណ្ឌកម្មកាន់តែខ្លាំង និងធ្ងន់ធ្ងរបន្ថែមទៀត។
អំពើហឹង្សារវាងអ៊ីស្រាអែល និងអ្នកតំណាងអ៊ីរ៉ង់ នៅទូទាំងតំបន់មជ្ឈិមបូព៌ា បានរីកកាន់តែធំឡើង ក្នុងរយៈពេលប្រាំមួយខែនៃការបង្ហូរឈាមនៅតំបន់ហ្កាហ្សា ដោយបង្កើនការព្រួយបារម្ភថាសង្រ្គាមស្រមោលរបស់សត្រូវដែលអូសបន្លាយយូរអង្វែង អាចឈានដល់ជម្លោះដោយផ្ទាល់។
អ៊ីស្រាអែល បាននិយាយថា ខ្លួននឹងសងសឹកបន្ទាប់ពីមានការវាយប្រហារកាលពីថ្ងៃសៅរ៍ ជាការវាយប្រហារដោយផ្ទាល់លើកដំបូងមិនធ្លាប់មានទៅលើអ៊ីស្រាអែល ធ្វើឡើងដោយអ៊ីរ៉ង់ ប៉ុន្តែពុំបណ្តាលឱ្យ មនុស្សស្លាប់នោះទេ បន្ទាប់ពីអ៊ីស្រាអែល និងសម្ព័ន្ធមិត្ត បានបាញ់ទម្លាក់មីស៊ីលនិងយានដ្រូនរាប់រយគ្រឿង។
ទីក្រុងតេអេរ៉ង់ បានបើកការវាយប្រហារទាំងនោះ ជាការឆ្លើយតបទៅនឹងការវាយប្រហារតាមអាកាសដែលសន្មត់ថាជាអ៊ីស្រាអែលកាលពីថ្ងៃទី ១ ខែមេសា ដែលបានបំផ្លាញអគារមួយកន្លែងនៅក្នុងបរិវេណស្ថានទូតអ៊ីរ៉ង់ នៅទីក្រុងដាម៉ាស ប្រទេសស៊ីរី និងបានសម្លាប់មន្ត្រីអ៊ីរ៉ង់ជាច្រើននាក់រួមទាំងឧត្តមសេនីយ៍ជាន់ខ្ពស់ម្នាក់ផងដែរ។