ខណៈដំណើរការជ្រើសរើសគណៈវិនិច្ឆ័យ កំពុងត្រូវបានធ្វើឡើងចុងក្រោយនៅក្នុងតុលាការទីក្រុង Manhattan សហរដ្ឋអាមេរិក កាលពីថ្ងៃសុក្រ សម្រាប់ការជម្រះក្តីបទព្រហ្មទណ្ឌពីបទប្រាក់បំបិតមាត់ ជាប្រវត្តិសាស្រ្តរបស់លោក Donald Trump បុរសម្នាក់បានដុតខ្លួនឯងនៅក្នុងសួនច្បារក្បែរនោះ ហើយបានឆេះអស់រយៈពេលជាច្រើននាទី មុនពេលអណ្តាតភ្លើងត្រូវបាននគរបាល និងបុគ្គលិកនាយកដ្ឋានពន្លត់អគ្គីភ័យ ពន្លត់។
មន្ត្រីបាននិយាយថា បុរសនោះមានអាយុជាង៣០ ឆ្នាំ ត្រូវបានសង្គ្រោះឲ្យរួចជីវិត ប៉ុន្តែស្ថិតក្នុងស្ថានភាពធ្ងន់ធ្ងរនៅមន្ទីរពេទ្យ។ ប្រធានអង្គភាពនគរបាលទីក្រុង New York លោក Jeffrey Maddreyនិយាយថា បុរសរូបនេះ បានដើរទៅកណ្តាលសួនច្បារ នៅពេលគាត់នៅក្នុងសួនច្បារគាត់ចាប់ផ្ដើមបើកកាបូបសៀវភៅ គាត់យកក្រដាសជាច្រើនសន្លឹកនិងខិត្តប័ណ្ណចេញ ហើយគាត់បោះខិត្តប័ណ្ណពាសពេញសួនច្បារ បន្ទាប់មកទាញយកកំប៉ុងមួយ ហើយចាក់វត្ថុរាវមួយទៅលើខ្លួនគាត់។ អង្គធាតុរាវនោះត្រូវបានគេជឿថាជាសារធាតុចំហេះ ហើយគាត់បានដុតខ្លួនឯង។ ឧបទ្ទវហេតុនេះត្រូវបានថតដោយកាំមេរ៉ាសន្តិសុខនៅទីនោះសម្រាប់អង្គជំនុំជម្រះក្តី។
នាយកដ្ឋាននគរបាលទីក្រុងញូវយ៉ក និយាយថា បុរសដែលពួកគេបានកំណត់អត្តសញ្ញា ទំនងជាពុំបានកំណត់គោលដៅលើ លោក Trump ឬអ្នកផ្សេងទៀតដែលពាក់ព័ន្ធទៅនឹងការជំនុំជម្រះក្តីនោះទេ។
ស្នងការរង លោក Tarik Sheppard បាននិយាយថា ខិត្តប័ណ្ណមួយសន្លឹកក្នុងចំណោមខិត្តប័ណ្ណដែលបុរសនោះបានបោះចោល រួមមានការនិយាយយោងទៅលើ «មហាសេដ្ឋីអាក្រក់» ប៉ុន្តែផ្នែកដែលអាចមើលឃើញដោយសារព័ត៌មាន Reuters ពុំបាននិយាយអំពី លោក Trump ទេ។