ក្រុមមន្ត្រី បាននិយាយថា អាជ្ញាធររបស់ប្រទេសគុយបា កាលពីថ្ងៃសុក្រ ទី១៩ ខែមេសា បានធ្វើមាតុភូមិនិវត្តន៍ក្រុមជនជាតិគុយបាចំនួន៤៩នាក់ ដែលបានជាប់ខ្លួននៅក្នុងប្រទេសហៃទី អស់រយៈពេលជាង៤០ ថ្ងៃ ដោយសារតែវិបត្តិអំពើហិង្សា នៅក្នុងប្រទេសតំបន់សមុទ្រការ៉ាអ៊ីបមួយនេះ។
ជើងហោះហើរ បានទៅដល់ទីក្រុងកាំម៉ាហ្គូអ៊ី(Camaguey)។ វាគឺជាជើងហោះហើរដំបូងក្នុងចំណោមជើងហោះហើរចំនួន៤ ដែលនឹងជម្លៀសប្រជាជនគុយបាចំនួន២៥៤នាក់ ដែលជាប់ខ្លួននៅក្នុងប្រទេសហៃទី។
នាង យ៉ៃលីន ណាវ៉ារ៉ូ ជនជាតិគុយបា បាននិយាយបន្ទាប់ពីការទៅដល់ប្រទេសរបស់នាងថា នាងអរគុណអាជ្ញាធររបស់ប្រទេស ដែលបានរៀបចំការធ្វើដំណើរមាតុភូមិនិវត្តន៍នេះ។
រូបភាពដែលផ្សាយដោយទូរទស្សន៍រដ្ឋគុយបា បានបង្ហាញពីជនជាតិគុយបា ធ្វើមាតុភូមិនិវត្តន៍ឡើងជិះរថយន្តក្រុង ដែលនឹងនាំពួកគេទៅកាន់ខេត្តរៀងៗខ្លួន។
រដ្ឋាភិបាលរបស់ប្រទេសហៃទី បានបង្កើតជាផ្លូវការនូវក្រុមប្រឹក្សាប្រធានាធិបតីអន្តរកាល ដែលមានសមាជិកប្រាំបួនរូប ជាវិធានការពន្យារពេលដ៏យូរ ដែលមានបំណងជាជំហានដំបូងក្នុងការស្ដារឡើងវិញសន្តិសុខដល់ប្រទេសតំបន់សមុទ្រការ៉ាអ៊ីបដែលរងការបំផ្លិចបំផ្លាញមួយនេះ។