ក្រុមប្រទេសមហាអំណាចទាំង៧ (G7) កាលពីថ្ងៃសុក្រ បានសន្យាថា នឹងពង្រឹងការការពារដែនអាកាសរបស់អ៊ុយក្រែន ដើម្បីប្រឆាំងនឹងការវាយប្រហាររបស់រុស្ស៊ីដែលបណ្តាលឲ្យមនុស្សស្លាប់កាន់តែច្រើន ឡើង ហើយបានប្រាប់ប្រទេសចិនឲ្យបញ្ឈប់ការគាំទ្រឧស្សាហកម្មយោធារបស់ទីក្រុងមូស្គូ ប្រសិនបើខ្លួនចង់បានទំនាក់ទំនងល្អជាមួយលោកខាងលិច។

រដ្ឋមន្ត្រីការបរទេសមកពីប្រទេស G7 រួមមានសហរដ្ឋអាមេរិក អ៊ីតាលី កាណាដា បារាំង អាល្លឺម៉ង់ ជប៉ុន និងអង់គ្លេស បានបញ្ចប់កិច្ចពិភាក្សារយៈពេលបីថ្ងៃ នៅលើកោះ Capri ដែលគ្របដណ្តប់ដោយសង្រ្គាមនៅអ៊ុយក្រែន និងមជ្ឈិមបូព៌ា។

ពួកគេ បានទទួលស្គាល់ថា ពួកគេត្រូវតែធ្វើបន្ថែមទៀត ដើម្បីជួយអ៊ុយក្រែន ដែលកំពុងតែតស៊ូក្នុងការទប់ទល់នឹងកងកម្លាំងរុស្ស៊ីដែលខ្លាំងជាង ហើយបានជំរុញឲ្យមានការបន្ធូរបន្ថយនៅមជ្ឈិមបូព៌ា ជាកន្លែងដែលសត្រូវដ៏ជ្រាលជ្រៅរវាងអ៊ីស្រាអែល និងអ៊ីរ៉ង់ ប្រថុយនឹងបង្កឲ្យមានជម្លោះក្នុងតំបន់ កាន់តែធំឡើង។

ប៉ុន្តែរដ្ឋមន្ត្រីទាំងអស់ ក៏បាននិយាយដែរថា វិបត្តិសកលលោកដ៏ច្រើន កំពុងទាញបណ្តាប្រទេសលទ្ធិប្រជាធិបតេយ្យឈានមុខគេ ឲ្យខិតទៅជិតគ្នា។

រដ្ឋមន្ត្រីការបរទេសអាមេរិក លោកអង់តូនី ប្ល៊ីនខិន ( Antony Blinken) បាននិយាយថា៖«លទ្ធផលិរបស់យើង បានកើតចេញពីកិច្ចប្រជុំរបស់រដ្ឋមន្ត្រីការបរទេសនេះ ហើយយើងកាន់តែមានការរួបរួមគ្នាជាងពេលណាៗទាំងអស់»។