អាមេរិក ៖ កាលពីថ្ងៃសៅរ៍ សភាសហរដ្ឋអាមេរិក បានអនុម័តកញ្ចប់ថវិកាផ្តល់ជំនួយ ៩៥ពាន់លានដុល្លារដល់អ៊ុយក្រែន អ៊ីស្រាអែល និងកោះតៃវ៉ាន់ បើទោះបីជាមានការជំទាស់ពីក្រុមសាធារណរដ្ឋក៏ដោយ ហើយប្រធានាធិបតីសហរដ្ឋអាមេរិកលោក Joe Biden បានជំរុញព្រឹទ្ធសភាអនុម័តសេចក្តីស្នើច្បាប់នេះឲ្យបានឆាប់ ។ 

 លោក Biden ដែលបានជំរុញឲ្យសភាអនុម័តជំនួយបន្ថែមទៀតសម្រាប់អ៊ុយក្រែន តាំងពីឆ្នាំមុនមកម្ល៉េះនោះ បាននិយាយនៅក្នុងសេចក្តីថ្លែងការណ៍ថា វាដល់ពេលត្រូវការបន្ទាន់បំផុត ពេលដែលអ៊ីស្រាអែលប្រឈមនឹងការវាយប្រហារមិនធ្លាប់ដែលមានពីអ៊ីរ៉ង់ ហើយអ៊ុយក្រែន ស្ថិតក្រោមការទម្លាក់គ្រាប់បែកឥតឈប់ឈរពីរុស្ស៊ី ។ 

 ខណៈពេលនោះដែរ ប្រធានាធិបតីអ៊ុយក្រែនលោក Volodymyr Zelenskiy បានបង្ហាញការថ្លែងអំណរគុណរបស់លោក ដោយលោកនិយាយថា ក្រុមតំណាងរាស្រ្តសហរដ្ឋអាមេរិក ធ្វើចំណាត់ការដើម្បីរក្សាប្រវត្តិសាស្រ្តដើរលើផ្លូវត្រូវ ។ 

 គេរំពឹងថា ព្រឹទ្ធសភាសហរដ្ឋអាមេរិក នឹងអនុម័តសេចក្តីស្នើច្បាប់នេះនៅសប្តាហ៍ក្រោយ រួចបញ្ជូនឲ្យលោក Biden ចុះហត្ថលេខាក្លាយជាច្បាប់ ៕