បាតុករអ៊ីស្រាអែល រាប់ពាន់នាក់ បានចេញតវ៉ាកាលពីថ្ងៃសៅរ៍ (២០ មេសា) ដើម្បីអំពាវនាវឱ្យមានការបោះឆ្នោតថ្មី និងទាមទារឱ្យមានវិធានការបន្ថែមទៀតពីរដ្ឋាភិបាលដើម្បីនាំយកចំណាប់ថ្នូរដែលឃុំខ្លួនក្នុងតំបន់ហ្កាហ្សា ត្រឡប់មកវិញ ក្នុងការតវ៉ាជុំចុងក្រោយប្រឆាំងនឹងលោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu)។

ការតវ៉ាកើតឡើងនៅពេលដែលសង្រ្គាមនៅហ្កាហ្សាបានរំកិលដល់ខែទី០៧ ហើយស្របពេលមានកំហឹងកាន់តែខ្លាំងឡើងចំពោះវិធីសាស្រ្តរបស់រដ្ឋាភិបាលចំពោះចំណាប់ថ្នូរអ៊ីស្រាអែល ១៣៣ នាក់ ដែលនៅតែត្រូវបានកាន់កាប់ដោយចលនាអ៊ីស្លាមហាម៉ាស។ 

ការស្ទង់មតិបង្ហាញថា ប្រជាជនអ៊ីស្រាអែលភាគច្រើនបានស្តីបន្ទោសលោក ណេតាន់យ៉ាហ៊ូ ចំពោះការបរាជ័យផ្នែកសន្តិសុខ ដែលនាំទៅដល់ការវាយប្រហារដ៏បំផ្លិចបំផ្លាញដោយក្រុមយុទ្ធជនហាម៉ាស លើសហគមន៍នៅភាគខាងត្បូងប្រទេសអ៊ីស្រាអែល កាលពីថ្ងៃទី០៧ ខែតុលា។

នាយករដ្ឋមន្ត្រីដែលកាន់អំណាចយូរបំផុតរបស់អ៊ីស្រាអែលរូបនេះបានច្រានចោលការបោះឆ្នោតមុនកាលកំណត់ ដែលការស្ទង់មតិបង្ហាញថាលោកនឹងចាញ់ ដោយលោកនិយាយថា ការបោះឆ្នោតនៅពាក់កណ្តាលពេលកំពុងមានសង្រ្គាម នឹងក្លាយជារង្វាន់សម្រាប់ក្រុមហាម៉ាស។

លោក ណេតាន់យ៉ាហ៊ូ បានសន្យាបន្តយុទ្ធនាការអ៊ីស្រាអែល នៅតំបន់ហ្កាហ្សា ដែលអាជ្ញាធរសុខាភិបាលក្នុងតំបន់បាននិយាយថា បានសម្លាប់ប្រជាជនប៉ាឡេស្ទីនជាង ៣៤.០០០នាក់ ហើយនឹងបន្តប្រយុទ្ធរហូតដល់ចំណាប់ថ្នូរទាំងអស់ត្រូវបាននាំយកមកវិញ និងរហូតដល់ក្រុមហាម៉ាស ត្រូវបានបំផ្លាញ៕