ចិន៖ យោងតាមមជ្ឈមណ្ឌលឧតុនិយមជាតិបានឱ្យដឹងថា ព្យុះទីហ្វុង In-Fa បានធ្លាក់ចុះដល់ដីគោកជាលើកទី២ កាលពីព្រឹកថ្ងៃចន្ទនៅតំបន់ឆ្នេរភីងយូ នៃខេត្តជែស៊ីងភាគខាងកើតប្រទេសចិន។
ព្យុះទីហ្វុងបានប៉ះពាល់ដល់តំបន់ឆ្នេរសមុទ្រសៀងហៃ ខេត្តជេជាំង និងខេត្តជាំងស៊ូរបស់ប្រទេសចិនដោយមានភ្លៀងធ្លាក់ខ្លាំងបង្កជាទឹកជំនន់ និងខ្យល់បក់ខ្លាំង។ ភូមិមួយចំនួននៅក្នុងខេត្តជេជាំងត្រូវបានជន់លិច។ កិច្ចប្រឹងប្រែងគ្រប់គ្រងទឹកជំនន់ និងការជម្លៀសបានចាប់ផ្តើមកាលពីថ្ងៃអាទិត្យ មុនពេលការមកដល់ជាលើកទី២ របស់ព្យុះទីហ្វុង In-Fa។ នាវាចម្លងទាំងអស់ត្រូវបានផ្អាកការធ្វើដំណើរ នៅតាមភូមិនានាក្នុងតំបន់ឆ្នេរភីងយូ។ ប្រជាពលរដ្ឋសរុបចំនួន ១៥០,០០០នាក់នៅក្នុងខេត្តជែស៊ីង ត្រូវបានគេផ្ទេរទៅកន្លែងសុវត្ថិភាពរហូតដល់យប់ថ្ងៃអាទិត្យ។
ព្យុះទីហ្វុងនេះក៏បានធ្វើឱ្យរំខានដល់ប្រព័ន្ធដឹកជញ្ជូន នៅឆ្នេរភាគខាងកើតនៃប្រទេសចិនផងដែរ ដែលបណ្តាលឱ្យលុបចោលរថភ្លើងល្បឿនលឿនភាគច្រើន និងបិទព្រលានយន្តហោះចំនួន ១៨ នៅសៀងហៃ ខេត្តជេជាំង និងខេត្តជាំងស៊ូ។ នេះជាព្យុះទីហ្វុងទី៦ នៅឆ្នាំនេះដែលបានបោកបក់មកលើដីគោកនៅម៉ោងប្រមាណ ១២ និង ៣០នាទីថ្ងៃអាទិត្យជាលើកដំបូងនៅក្នុងស្រុកពូអ៊ូយ ក្រុងចូសាន នៃខេត្តជេជាំង៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
