មជ្ឈមណ្ឌលសម្រាប់ការអប់រំឌីជីថល និងការអប់រំពីចម្ងាយក្រោមការដឹកនាំរបស់ឯកឧត្តមបណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា បានសហការជាមួយសាស្រ្តាចារ្យនៃសាកលវិទ្យាល័យភូមិន្ទភ្នំពេញ ដើម្បីផ្តល់ជូនការបង្រៀនបំប៉នសមត្ថភាពត្រៀមប្រឡងសញ្ញាបត្រមធ្យមសិក្សាទុតិយភូមិដល់សិស្សានុសិស្សដែលជាបេក្ខជនត្រៀមប្រឡងដោយឥតគិតថ្លៃដោយគម្រោងនេះត្រូវបានដាក់ឈ្មោះថា "ប្រព័ន្ធបង្រៀនសមកាលកម្ម ឬ Live Teaching System"។
វគ្គបំប៉នសមត្ថភាពនេះត្រូវបានរៀបចំក្នុងទម្រង់ជាក្លឹបសិក្សាតាមមុខវិជ្ជានីមួយៗសម្រាប់សិស្សថ្នាក់ទី១២ ដោយនឹងមានការចូលរួមបង្រៀនដោយផ្ទាល់ពីសាស្រ្តាចារ្យល្បីៗមានដូចជា៖
១. លោកគ្រូ ធូ ភន
២. លោកគ្រូ ជ័យ ថាវី
៣. លោកគ្រូ វ៉ាន់ វី
៤. លោកគ្រូ ហង់ ស៊ីម
៥. បណ្ឌិត ស៊ាម ង៉ុន និងសាស្ត្រាចារ្យល្បីៗជាច្រើនទៀតតាមមុខវិជ្ជា ។
វគ្គបំប៉នសមត្ថភាព ឬ គម្រោង Live Teaching នេះត្រូវបានរៀបចំឡើងក្នុងគោលបំណងផ្តល់ការគាំទ្រដោយផ្ទាល់ចំពោះសិស្សានុសិស្សដែលត្រូវការបំប៉នសមត្ថភាពបន្ថែមដោយធានាបានថាសិស្សានុសិស្សទាំងអស់នឹងទទួលបានការសិក្សាតាមបែបពន្លឿនដោយទទួលបានការគាំទ្រផ្នែកស្មារតី និងបង្ការពួកគេពីភាពឯកោរ និងបោះបង់ការសិក្សា។
វគ្គបំប៉នសមត្ថភាពនេះត្រូវបានរៀបចំនៅវិទ្យាល័យបណ្តាញចំនួន៤ និងមានការផ្សាយផ្ទាល់ពីវិទ្យាល័យឥន្ទ្រទេវី ដោយវិទ្យាល័យបណ្តាញទាំង៤ មានដូចជា៖
១. វិទ្យាល័យហ៊ុនសែនបុរី១០០ខ្នង
២. វិទ្យាល័យកំបូល
៣. វិទ្យាល័យទឹកល្អក់
៤. វិទ្យាល័យជាស៊ីមជ្រោយចង្វារ។
វគ្គបំប៉នសមត្ថភាពនេះនឹងប្រព្រឹត្តទៅនៅរៀងរាល់ថ្ងៃអាទិត្យចាប់ពីម៉ោង ៧៖០០ នាទីព្រឹក រហូតដល់ម៉ោង ៥៖០០នាទីរសៀលដោយមានការបែងចែកកាលវិភាគតាមមុខវិជ្ជា។
ក្រៅពីការផ្សាយផ្ទាល់នៅតាមវិទ្យាល័យគោលដៅ វគ្គបំប៉នសមត្ថភាពនេះក៏មានការផ្សាយបន្តផ្ទាល់ទៅកាន់សិស្សានុសិស្សទូទាំងប្រទេស តាមរយៈគេហទំព័រទូរសិក្សា របស់មជ្ឈមណ្ឌល សម្រាប់ការអប់រំឌីជីថល និងការអប់រំពីចម្ងាយ។
សម្រាប់ព័ត៌មានបន្ថែមសូមតាមដានទំព័រផ្លូវការរបស់ទូរសិក្សា៖ Duraseksa - ទូរសិក្សា ឬតេឡេក្រាមឆាណែល៖ https://t.me/duraseksa
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
