អគ្គនាយករង នៃមូលនិធិជាតិជំនួយសង្គម បានអំពាវទៅកាន់គ្រួសារក្រីក្រឱ្យ​មានការរួសរាន់​ទៅ​ចុះ​ឈ្មោះចូលទៅក្នុងកម្មវិធីជំនួយសង្គមថ្មី «កម្មវិធីកញ្ចប់គ្រួសារ»។ ការអំពាវនាវ នេះគឺក្នុង​គោល​ដៅ​សំខាន់ចង់ឱ្យគ្រួសារដែលមានបណ្ណក្រីក្រ ទទួលបាន​សាច់ប្រាក់​ដែល​រដ្ឋាភិបាល​ផ្ដល់​ជូន​ចាប់​ពីខែដំបូងតែម្ដង។

រាជរដ្ឋាភិបាលកម្ពុជា បានសម្រេចចាប់ផ្ដើមអនុវត្តកម្មវិធីជំនួយសង្គមថ្មី «កញ្ចប់គ្រួសារ» ចាប់​ពីខែមេសា ឆ្នាំ២០២៤នេះ។ បច្ចុប្បន្នមន្ត្រីមូលដ្ឋានឃុំ-សង្កាត់ ទូទាំងប្រទេស កំពុងបន្ត​ចុះ​ឈ្មោះ​គ្រួសារ​មាន​បណ្ណក្រីក្រទាំងអស់ ចូលទៅក្នុងកម្មវិធីថ្មីនេះ ដើម្បីបើកផ្ដល់ថវិកាប្រចាំខែ ចាប់ពី​ខែ​មេសានេះតទៅ។

ក្នុងដំណាក់កាលនៃការចុះឈ្មោះនេះ លោក ជួរ រតនៈ អគ្គនាយករងនៃមូលនិធិជាតិជំនួយសង្គម អំពាវនាវទៅកាន់គ្រួសារមានបណ្ណក្រីក្រទាំងអស់ ត្រូវរួសរាន់ទៅចុះឈ្មោះចូលកម្មវិធីថ្មី នៅ​តាម​សាលា​ឃុំ-សង្កាត់។ ការអំពាវនាវ គឺស្របពេលដែលចំនួនគ្រួសារមានបណ្ណក្រីក្រទៅចុះឈ្មោះ ពុំទាន់​មាន​សន្ទុះច្រើន។ ជាក់ស្ដែងក្នុងរយៈពេលជិត ២០ថ្ងៃ គ្រួសារមានបណ្ណក្រីក្រក្នុងរង្វង់ ២៨ ម៉ឺនគ្រួសារប៉ុណ្ណោះដែលបានចុះឈ្មោះរួចរាល់ ខណៈ​ចំនួន​គ្រួសារ​មាន​បណ្ណ​ក្រីក្រ​សរុប​ទូទាំង​ប្រទេស​មាន​ប្រមាណ ៨០ម៉ឺនគ្រួសារ។

លោកអគ្គនាយករង លើកឡើងថាការទៅចុះឈ្មោះយឺតក្រោយថ្ងៃទី ២៩ ខែមេសា ឆ្នាំ២០២​៤​នេះ គឺមានន័យថាគ្រួសារនោះខកខានក្នុងការទទួលបានថវិកាឧបត្ថម្ភពីរាជរដ្ឋាភិបាល រយៈ​ពេល​មួយ​ខែ គឺថវិកាសម្រាប់ខែ មេសា ជាខែអនុវត្តដំបូង។

សម្រាប់កម្មវិធី «កញ្ចប់គ្រួសារ» ជាថវិកាគោលសម្រាប់គ្រួសារមានប័ណ្ណក្រីក្រនីមួយៗ គឺ​ទទួល​បាន​ ៣៤០០០ រៀល ក្នុងមួយខែ សម្រាប់កម្មវិធី «កញ្ចប់គ្រួសារ»ថ្មីនេះ។ សម្រាប់​សមាជិក​គ្រួសារ ​ដែលមានវ័យចាប់ពី ៦០ឆ្នាំឡើងទៅ ទទួលបានថវិកាបន្ថែមចំនួន ២៨០០០រៀល។ ជន​មាន​ពិការភាព និងអ្នកផ្ទុកមេរោគអេដស៍ ទទួលបានថវិការបន្ថែម ២៨០០០រៀល ដូចគ្នា​ផង​ដែរ​។ ចំពោះសិស្សសិក្សាពីថ្នាក់ទី ១ ដល់ថ្នាក់ទី ៩ ទទួលបានថវិកាបន្ថែម ២០ ០០០ រៀល​ក្នុង​មួយ​ខែ ​រីឯសិស្សសិក្សាពីថ្នាក់ទី ១០ ដល់ទី ១២ ទទួលបានថវិកាបន្ថែម ៣០ ០០០ ម៉ឺនរៀលក្នុង ១ខែ​។

ចំពោះស្ត្រីមានផ្ទៃពោះ និងកុមារអាយុក្រោមពីឆ្នាំ ទទួលបាននៅពេលបំពេញទៅតាមលក្ខណ្ឌ។ ការ​ទទួល​បាន​គឺ​នៅ​ពេលពិនិត្យផ្ទៃពោះ ពេលសម្រាល និងក្រោយពេលសម្រាល​នៅមន្ទីរ​ពេទ្យ​រដ្ឋ​។ ពេលពិន្យផ្ទៃពោះ ទទួលបានសាច់ប្រាក់ ៤ដង ១ដង ៨ម៉ឺនរៀល។ ពេលសម្រាលទទួលបាន ៤០​ម៉ឺន​រៀល និងក្រោយសម្រាលទទួលបាន ១០ដង ១ដងទទួលបាន ៨ម៉ឺនរៀល។

កម្មវិធី«កញ្ចប់គ្រួសារ» ជាការធ្វើសមហរណកម្ម ៤កម្មវិធីរួមគ្នា។ កម្មវិធីទី ១ គឺកម្មវិធី​ឧបត្ថម្ភ​សាច់​ប្រាក់​ជូន​ស្ត្រី​មានផ្ទៃពោះ និងកុមារអាយុក្រោម ២ឆ្នាំ។ កម្មវិធីទី ២ គឺកម្មវិធីអាហារូករណ៍​សិស្ស​ក្រីក្រថ្នាក់បឋម និងមធ្យម។ កម្មវិធីទី៣ គឺកម្មវិធីឧបត្ថម្ភសាច់ប្រាក់ជូនជនមានពិការភាព និង​កម្មវិធីទី ៤ គឺកម្មវិធីឧបត្ថម្ភសាច់ប្រាក់ជូនចាស់ជរាមានវ័យចាប់ពី ៦០ឡើងទៅ៕ អត្ថបទ៖ គឺមហុក