នៅព្រឹកថ្ងៃ២២ ខែមេសានេះ ឯកឧត្តម ឧបនាយករដ្ឋមន្រ្តី ស៊ុន ចាន់ថុល អនុប្រធានទី១ ក្រុម​ប្រឹក្សា​អភិវឌ្ឍន៍កម្ពុជា និងឯកឧត្តម វ៉ាង យី រដ្ឋមន្រ្តីការបរទេសចិន បានអញ្ជើញដឹកនាំ​កិច្ច​ប្រជុំ​គណៈកម្មការ​សម្របសម្រួលអន្តររដ្ឋាភិបាលកម្ពុជា-ចិន លើកទី៧។

នាឱកាសនោះ ឯកឧត្តម ឧបនាយករដ្ឋមន្រ្តី ស៊ុន ចាន់ថុល បានថ្លែងអំណរគុណ និង​វាយ​តម្លៃ​ខ្ពស់​ចំពោះកា​រអញ្ជើញរបស់ឯកឧត្តម វ៉ាង យី និងគណៈប្រតិភូចូលរួម​ក្នុង​កិច្ច​ប្រជុំ​លើកទី៧​នា​ពេល​នេះ។​ ក្នុងនោះ ឯកឧត្តម វ៉ាង យី បានសហការយ៉ាងជិតស្និទ្ធជាមួយកម្ពុជា ចាប់តាំង​ពី​បង្កើត​ឱ្យមា​នគណៈកម្មការសម្របសម្រួលអន្តររដ្ឋាភិបាលកម្ពុជា-ចិនលើកដំបូង។

បន្ទាប់​ពីកិច្ចប្រជុំគណៈកម្មការសម្របសម្រួលអន្តររដ្ឋាភិបាលកម្ពុជា-ចិនលើកទី៧ បានបញ្ចប់ ភាគីទាំងពីរ បានអញ្ជើញ​ក្នុង​ពិធី​ចុះហត្ថ​លេខា​លើ​លិខិត​ប្តូរ​សារ​ស្តីពី​ការ​ផ្តល់​ជំនួយ​ពី​សាធារណរដ្ឋ​ប្រជាមានិតចិន សម្រាប់គម្រោងផ្គត់ផ្គង់ទឹកស្អាតនៅជនបទ ដំណាក់កាលទី២, ប្រគល់ និងទទួលវិញ្ញាបនបត្រនៃគម្រោងផែនការមេអភិវឌ្ឍន៍កសិកម្មកម្ពុជា និងពិធីសារ​ទាក់ទង​នឹង​ការ​ធ្វើចត្តាឡីស័ក និងលក្ខខណ្ឌតម្រូវ​អនាម័យ​សម្រាប់​ផលិតផល​ចំណី​សុន​​ខ​ពាក់​កណ្តាល​សម្រេច​ធ្វើ​ពីស្បែកគោសម្រាប់នាំចេញពីកម្ពុជាទៅចិន។

ក្រៅពីនោះ ភាគីទាំងពីរ បានអញ្ជើញក្នុងពិធីប្រគល់ និងទទួលសៀវភៅ​កំណត់​ហេតុ​របស់​នគរចេន​ឡាអំពីទឹកដី ប្រពៃណី និងទំនៀមទំលាប់ប្រែសម្រួលជាភាសាខ្មែរ ខណៈចុងក្រោយ ភាគី​ទាំង​ពីរ ក៏បានចុះហត្ថលេខាលើការនាំចេញទីផ្សារផ្លែដូងស្រស់ពីកម្ពុជាទៅចិនផងដែរ។

យ៉ាង​ណាមិញ ដំណើរទស្សនកិច្ចរបស់ឯកឧត្តម វ៉ាង យី នាពេលនេះ ធ្វើឡើង​ស្រប​ពេល​នឹង​ការ​ប្រារព្ធ​ឆ្នាំ​នៃការផ្លាស់ប្តូរប្រជាជន និងប្រជាជន កម្ពុជា-ចិន ហើយនឹងរួមចំណែក​ដល់​ការ​ពង្រឹង​មិត្ត​ភាព​ដែក​ថែប និងពង្រីកបន្ថែមទៀតនូវកិច្ចសហប្រតិ បត្តិការជាដៃគូយុទ្ធ​សាស្រ្ត​គ្រប់​ជ្រុង​ជ្រោយ ធ្វើឲ្យស៊ីជម្រៅនូវការកសាងសហគមន៍វាសនារួមប្រកបដោយ គុណភាពខ្ពស់ កម្រិតខ្ពស់ និង​ស្តង់​ដាខ្ពស់ លើកកម្ពស់ក្របខណ្ឌកិច្ចសហប្រតិបត្តិការត្បូងពេជ្យ ព្រម ទាំងជំរុញ​កិច្ច​សហប្រតិបត្តិការនៅក្នុងវេទិកាតំបន់ និងអន្តរជាតិ ដើម្បីជាផលប្រយោជន៍ទៅវិញទៅមក សម្រាប់​ប្រទេស និងប្រជាជនទាំងពីរ(កម្ពុជា-ចិន)៕ អត្ថបទ សេក ឧត្តម