កណ្ដាល ៖ កាកបាទក្រហមកម្ពុជា ដែលស្ថាប័នមនុស្សធម៌ដ៏ធំនៅកម្ពុជា និងជាជំនួយការឱ្យអាជ្ញាធរសាធារណៈ ដើម្បីជួយសម្រាលការលំបាកដល់ប្រជាពលរដ្ឋងាយរងគ្រោះបំផុត និងការបោះជំហានទៅមុខកាន់តែរឹងមាំ ប្រកបដោយភាពម្ចាស់ការលើខ្លួនឯងក្នុងបេសកកម្មមនុស្សធម៌។ ជាក់ស្តែងនៅថ្ងៃទី២២ ខែមេសា ឆ្នំា២០២៤នេះ សាខាកាកបាទក្រហមកម្ពុជាខេត្ដកណ្តាល និងសាខាកាកបាទក្រហមកម្ពុជាខេត្ដរតនះគិរី បានចុះហត្ថលេខាលើអនុស្សារណៈយោគយល់គ្នា ជួយពង្រឹងសមត្ថភាព និងលទ្ធភាពក្នុងការឆ្លើយតបភ្លាមៗនឹងតម្រូវរបស់ប្រជាជនងាយរងគ្រោះ។

ពិធីចុះអនុស្សារណៈនេះបានធ្វើឡើងក្រោមអធិបតីភាព លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា ដែលប្រព្រឹត្ដទៅ នៅទីស្នាក់ការកណ្ដាលកាកបាទក្រហមកម្ពុជា ដោយមានការអញ្ជើញចូលរួមពី ឯកឧត្តម គង់ សោភ័ណ្ឌប្រធានគណៈកម្មាធិការសាខាកាកបាទក្រហមកម្ពុជាខេត្តកណ្តាល និងឯកឧត្តម ញ៉ែម សំអឿន ប្រធានគណៈកម្មាធិការសាខាកាកបាទក្រហមកម្ពុជាខេត្តរតនះគិរី។

ក្នុងឱកាសនោះ លោកជំទាវ ពុំ ចន្ទីនី បានថ្លែងថា ក្នុងនាមតំណាងដ៏ខ្ពង់ខ្ពស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា សូមពាំនាំនូវការកោតសរសើរ ចំពោះសាខាទាំងពីរនេះ ដែលមានគំនិតផ្ដួចផ្ដើម ព្រមព្រៀងគ្នារៀបចំឱ្យមានជាអនុស្សរណៈនេះ បានបង្ហាញពីភាពចេះជួយគ្នាទៅវិញទៅមក។ លោកជំទាវបន្ដថា នេះជាលើកទី២ហើយ បន្ទាប់ពីសាខាខេត្តព្រះសីហនុ និង សាខាខេត្តស្ទឹងត្រែង ដែលសាខាទាំងពីរនេះបានចាប់ដៃគ្នា ពង្រឹងគុណភាពសមត្ថភាព និងលទ្ធភាពក្នុងការឆ្លើយតបជាមួយប្រជាពលរដ្ឋ ឱ្យកាន់តែទាន់ពេលវេលា ពេលជួបគ្រោះមហន្ដរាយនានា ដែលកន្លងតែងតែឆ្លើយតបសម្រាប់តែក្នុងខេត្ដរៀងៗខ្លួន។ ការសហការគ្នានេះ គឺជាការលើកកម្ពស់សាមគ្គីភាព ជួយគ្នាទៅវិញទៅមកលើផ្នែកធន់ធាន បច្ចេកទេស ផ្លាស់ប្ដូរព័ត៌មាន ការផ្លាស់ប្ដូរទស្សនកិច្ចសិក្សា និងបទពិសោធន៍ តាមរយៈការអនុវត្ដយុទ្ធសាស្ដ្រ ២០២១-២០៣០ របស់កាកបាទក្រហមកម្ពុជា ដែលមានវិស័យអាទិភាពចំនួន៤។

លោកជំទាវអគ្គលេខាធិការ បានគូសបញ្ជាក់ថា នេះគឺជាការចែករំលែកក្នុងសមាគមជាតិយើងរវាងសាខាដែលមានលទ្ធភាពច្រើន ជួយដល់សាខាដែលមានលទ្ធភាពតិច ហើយនេះក៏ជាការសម្រាលបន្ទុករបស់ស្នាក់ការកណ្ដាល។ ស្នាក់ការកណ្ដាលមានសេចក្ដីសោមនរីករាយ ហើយទោះជាសាខាទាំងពីរ ជួយគ្នាទៅវិញមកក៏ដោយ ស្នាក់កណ្ដាលនៅតែយកចិត្ដទុកដាក់ ជួយធ្វើអន្ដរាគមដដែល នៅពេលដែលមានតម្រូវការចំបាច់ គឺនៅតែជំហរផ្ដល់ផ្នែកបច្ចេកទេស និងជាខ្នងបង្អែកក្នុងការកសាងសមត្ថភាពរបស់សាខានីមួយៗឱ្យមានភាពធន។ លោកជំទាវសូមជូនពរឱ្យកិច្ចសហប្រតិបត្ដិការនេះ ទទួលបានជោគជ័យ និងមានប្រសិទ្ធភាព។ 

សូមបញ្ជាក់ថាគោលបំណងនៃការចុះហត្ថលេខា លើអនុស្សរណៈយោគយល់ រវាងសាខាទាំងពីរនេះ គឺធ្វើឡើងដើម្បីរឹតចំណងមិត្តភាព សាមគ្គីភាព សហប្រតិបតិ្តការ និងជួយគាំទ្របច្ចេកទេស ចែករំលែកបទពិសោធន៍ និងផ្លាស់ប្តូរព័ត៌មានគ្នាទៅវិញទៅមក ដើម្បីពង្រឹងភាពម្ចាស់ការរបស់សាខាតាមទិស វិមជ្ឈការ និងវិសហមជ្ឈការ និងជួយគ្នាទៅវិញទៅមកក្នុងពេលមានគ្រោះមហន្តរាយកើតឡើង ពេលមានការរីករាលដាលនៃជំងឺឆ្លងនានា ការងារសុខភាពសហគន៍ ការបណ្តុះបណ្តាល ការលើកកម្ពស់បរិស្ថានបៃតង និងការប្រែប្រួលអាកាសធាតុ៕​អត្ថបទ​៖​ សំ ងីម​