ក្រសួងវប្បធម៌ និងវិចិត្រសិល្បៈ ជាមួយនឹងអង្គការមជ្ឈមណ្ឌលខេមរសិក្សា (Center for Khmer Studies ហៅកាត់ CKS បានអនុស្សរណៈយោគយល់គ្នា ដើម្បីការគាំទ្រ​ការ​អភិវឌ្ឍ​លើ​វិស័យ​អប់​រំ​ថ្នាក់​ឧ​ត្តមសិក្សា និងការស្រាវជ្រាវផ្នែកសង្គម សាស្ត្រ មនុស្សសាស្ត្រ និងសិល្បៈ​នៅ​ប្រទេស​កម្ពុជា និងតំបន់មេគង្គ, នាទីស្តីការក្រសួង ព្រឹកថ្ងៃទី២២ ខែមេសា ឆ្នាំ២០២៤នេះ។

អនុស្សរណៈយោគយល់គ្នា ធ្វើឡើងក្រោមវត្តមានលោកជំទាវ ប៉ែន មុនីមករា រដ្ឋលេខាធិការ តំណាង​ក្រសួងវប្បធម៌ និងវិចិត្រសិល្បៈ និងកញ្ញា សួង សាម៉ីឌី នាយិការង និងប្រធាន​ស្តីទី​របស់​គម្រោង​អង្គ​ការមជ្ឈមណ្ឌលខេមរសិក្សា តំណាងអង្គការមជ្ឈមណ្ឌលខេមរសិក្សា។

កញ្ញា សួង សាម៉ីឌី បានលើកឡើងថា MOUនាព្រឹកនេះ គឺជាការបន្ត​កិច្ច​សហ​ប្រតិបតិ្តការ​រវាង​ស្ថាប័ន​ទាំង​ពីរ ក្នុងការលើកស្ទួយការអាន ចំណេះដឹងពាក់ព័ន្ធទៅនឹងប្រវតិ្តសាស្រ្ត វប្បធម៌​របស់​ព្រះរា​ជា​ណាចក្រកម្ពុជា តាមរយៈសកម្មភាពជាច្រើនរបស់មជ្ឈមណ្ឌលខេមរសិក្សា ព្រម​ទាំង​ផ្តល់​អាហា​រូបករណ៍ជូនដល់អ្នកស្រាវជ្រាវបញ្ញាវន្តរបស់ប្រទេសកម្ពុជា សហរដ្ឋអាមេរិក និងបារាំង ដើម្បី​ជំរុញឲ្យមានការសិក្សាស្រាវជ្រាវមកលើប្រវតិ្តសាស្រ្ត និងវប្បធម៌ របស់កម្ពុជាផងដែរ។

សូមបញ្ជាក់ថា ស្ថាប័នអនុវត្តគម្រោង អង្គការមជ្ឈមណ្ឌលខេមរសិក្សា អ្នកផ្តល់ជំនួយសំខាន់ៗ : រដ្ឋា​ភិបាល​អាមេរិក មូលនិធិផ្សេងៗ និងម្ចាស់ជំនួយលក្ខណៈឯកជន និងទីកន្លែងអនុវត្តគម្រោង : រាជធា​នី​ភ្នំពេញ និងខេត្តសៀមរាប ថេរៈវេលារបស់គម្រោង : ៣ ឆ្នាំ។ គោលដៅ​នៃ​កិច្ច​សហ​ប្រតិបត្តិការ​នៅ​ក្នុងគម្រោងមាន៖ ជំរុញឱ្យមានការស្រាវជ្រាវ និងកម្មវិធីផ្លាស់ប្តូរបញ្ញវន្តបរទេស តាមរយៈកម្មវិធីពហុវិស័យ ដែលលើក កម្ពស់ការសិក្សាពីប្រទេសកម្ពុជា និងប្រទេសក្នុងតំបន់។ ពង្រឹង​រចនាសម្ព័ន្ធអប់រំ និងវប្បធម៌កម្ពុជា តាមរយៈការបង្រៀនថ្នាក់ជាតិ និងជំនាញសិក្សា និង​ការ​បញ្ចូល​បញ្ញវន្តខ្មែរ និងអ្នកជំនាញចូលទៅក្នុងកម្មវិធីផ្លាស់ប្តូរថ្នាក់ជាតិ និងអន្តរជាតិ។ ជួយ​សហគមន៍​ក្នុង​ស្រុក តាមរយៈការផ្តល់សេវាកម្មបណ្ណាល័យ សន្និសីទ បាឋកថា ការបញ្ចាំង ភាពយន្ត និងសិក្ខាសាលា ទៅដល់ស្ថាប័នជាដៃគូជាតិ និងអន្តរជាតិ និងជួយ​បង្កើត​ឱ្យ​មាន​ទម្លាប់​នៃ​ការ​អាន​ក្នុងចំណោមនិស្សិតខ្មែរ និងកុមារតាមរយៈកម្មវិធីបកប្រែ និង បោះពុម្ព បណ្ណាល័យ​កុមារ និងសកម្មភាពផ្សេងៗជាច្រើនទៀត៕ អត្ថបទ រដ្ឋា