ប្រភពសន្តិសុខអ៊ីរ៉ាក់ពីរ និងមន្ត្រីអាមេរិកម្នាក់ បានប្រាប់សារព័ត៌មារ៉យទ័រថា យ៉ាងហោចណាស់ គ្រាប់រ៉ុ   ក្កែតចំនួន៥គ្រាប់ ត្រូវបានបាញ់ចេញពីទីប្រជុំជន Zummar របស់ប្រទេសអ៊ីរ៉ាក់ សំដៅទៅមូលដ្ឋានយោធាអាមេរិក នៅប្រទេសស៊ីរីភាគឦសាន កាលពីថ្ងៃអាទិត្យ (ទី២១ ខែមេសា)។ 

ការវាយប្រហារប្រឆាំងនឹងកងកម្លាំងអាមេរិក គឺជាលើកទី១ ចាប់តាំងពីដើមខែកុម្ភៈ នៅពេលដែលក្រុមគាំទ្រដោយអ៊ីរ៉ង់ នៅក្នុងប្រទេសអ៊ីរ៉ាក់ បានបញ្ឈប់ការវាយប្រហាររបស់ពួកគេប្រឆាំងនឹងទាហានអាមេរិក។

ការវាយប្រហារនេះ បានកើតឡើងមួយថ្ងៃបន្ទាប់ពីនាយករដ្ឋមន្ត្រីអ៊ីរ៉ាក់ លោក ម៉ូហាម៉េដ សៀអាល់ ស៊ូដានី ( Mohammed Shia al-Sudani) បានត្រឡប់ពីទស្សនកិច្ច នៅសហរដ្ឋអាមេរិក ជាទីដែលលោក បានជួបជាមួយប្រធានាធិបតីលោក ចូ បៃដិន( Joe Biden) នៅសេតវិមាន។

ការបង្ហោះនៅលើក្រុមបណ្តាញសង្គម Telegram ដែលមានទំនាក់ទំនងជាមួយក្រុមហេសបូឡា Kataib បាននិយាយថា ក្រុមប្រឆាំងប្រដាប់អាវុធ នៅក្នុងប្រទេសអ៊ីរ៉ាក់ បានសម្រេចចិត្តបន្តការវាយប្រហារឡើងវិញ បន្ទាប់ពីការផ្អាកជិតបីខែ បន្ទាប់ពីឃើញមានការរីកចម្រើនតិចតួចលើកិច្ចពិភាក្សា ដើម្បីបញ្ចប់សម្ព័ន្ធយោធាដឹកនាំដោយសហរដ្ឋអាមេរិក នៅក្នុងប្រទេសនេះ។

ក្រុមបណ្តាញសង្គម Telegram ដ៏ពេញនិយមមួយផ្សេងទៀត ដែលស្និទ្ធនឹងក្រុមហេសបូឡា គឺ សារ ព័ត៌មាន KatSabreen News ក្រោយមក បាននិយាយថា ពុំមានសេចក្តីថ្លែងការណ៍ជាផ្លូវការពីក្រុមដែលគាំទ្រដោយអ៊ីរ៉ង់នោះទេ។

មន្ត្រីអាមេរិកម្នាក់ដែលនិយាយក្នុងលក្ខខណ្ឌមិនបញ្ចេញឈ្មោះ បានអះអាងថា គ្រាប់រ៉ុក្កែតជាងចំនួន៥ គ្រាប់ ត្រូវបានបាញ់ចេញពីប្រទេសអ៊ីរ៉ាក់ឆ្ពោះទៅកាន់កងទ័ពនៅឯមូលដ្ឋានសម្ព័ន្ធភាព ក្នុងទីក្រុង Rumalyn ប្រទេសស៊ីរី ប៉ុន្តែមិនមានបុគ្គលិកអាមេរិកណាម្នាក់ រងរបួសនោះទេ។