នាយកពន្ធនាគាររបស់ប្រទេសអេក្វាឌ័រ ដែលគេស្គាល់ថា El Rodeo ត្រូវបានសម្លាប់ កាលពីថ្ងៃអាទិត្យនៅក្នុងការវាយប្រហារមួយដែលបានកើតឡើង ខណៈមនុស្សរាប់លាននាក់នៅក្នុងប្រទេសនេះ បានធ្វើដំណើរទៅបោះឆ្នោតសម្រាប់ការធ្វើប្រជាមតិ ដែលផ្តោតលើសង្គ្រាមឧក្រិដ្ឋកម្ម របស់ប្រធានាធិបតី លោក Daniel Noboa ។ មន្ត្រីរូបនេះ ត្រូវបានកំណត់អត្តសញ្ញាណនៅក្នុងការចេញផ្សាយព័ត៌មាន ដោយទីភ្នាក់ងារពន្ធនាគារជាតិរបស់ប្រទេសអេក្វាឌ័រ SNAI មានឈ្មោះ កូសម៉េ ដាមៀន ប៉ារ៉ាឡេស មឺចាន(Cosme Damián Parrales Merchann) ជានាយកពន្ធនាគារតំបន់ Manabi ប៉ុន្តែពុំមានព័ត៌មានលម្អិតបន្ថែមអំពីការស្លាប់របស់លោកត្រូវបានចែករំលែកនោះទេ។ ការិយាល័យរដ្ឋអាជ្ញាប្រទេសអេក្វាឌ័រ បានរាយការណ៍ថា មនុស្សម្នាក់ផ្សេងទៀត បានរងរបួសនៅក្នុងការវាយប្រហារ។ រហូតមកដល់ពេលនេះ ពុំទាន់មានការចាប់ខ្លួនមនុស្សណាម្នាក់នៅឡើយទេ។ ទីភ្នាក់ងារពន្ធនាគារជាតិរបស់ប្រទេសអេក្វាឌ័រ SNAI បាននិយាយថា ទីភ្នាក់ងារនឹងធ្វើការជាមួយអាជ្ញាធរតំបន់ ដើម្បីស៊ើបអង្កេតការស្លាប់របស់លោក Parrales និងបាននិយាយថា ការស្លាប់របស់លោកនាំមកនូវ ទុក្ខព្រួយដល់ប្រព័ន្ធស្តារនីតិសម្បទាសង្គមជាតិទាំងមូល។ លោក Parrales ត្រូវបានសម្លាប់នៅថ្ងៃតែមួយ ដែលប្រជាជនអេក្វាឌ័រ ត្រូវបានអំពាវនាវឱ្យទៅបោះឆ្នោតសម្រាប់ការបោះឆ្នោតប្រជាមតិ ផ្តោតលើបញ្ហាសន្តិសុខ ដែលអាចជំរុញរបៀបវារៈរបស់ប្រធានាធិបតី លោក Daniel Noboa ក្នុងការប្រយុទ្ធប្រឆាំងឧក្រិដ្ឋកម្ម។ ក្នុងចំណោមសំណើធំបំផុត គឺវិធានការដើម្បីអនុញ្ញាតឱ្យយោធាល្បាតជាមួយនគរបាល ប្រយុទ្ធប្រឆាំងឧក្រិដ្ឋកម្មរៀបចំទុក ជាអ្វីនាពេលបច្ចុប្បន្នអាចកើតឡើងនៅក្រោមស្ថានភាពរដ្ឋក្នុងគ្រាអាសន្ន ដែលមានដែនកំណត់រយៈពេល៩០ថ្ងៃ ដើម្បីអនុញ្ញាតឱ្យធ្វើបត្យាប័នជនជាតិអេក្វាឌ័រ ខណៈបច្ចុប្បន្នត្រូវបានហាមឃាត់ដោយរដ្ឋធម្មនុញ្ញ និងដើម្បីបង្កើនការដាក់ទោសចំពោះអ្នកទាំងឡាយណាដែលត្រូវបានរកឃើញថាមានពិរុទ្ធពីបទឧក្រិដ្ឋហិង្សា។ លោក Noboa សង្ឃឹមថាវិធានការទាំងនេះ នឹងជួយឱ្យលោកគ្រប់គ្រងកម្រិតនៃឧក្រិដ្ឋកម្មរៀបចំទុកដែលទាក់ទងទៅនឹងក្រុមជួញដូរគ្រឿងញៀន។

ប្រទេសអេក្វាឌ័រ ធ្លាប់ត្រូវបានគេស្គាល់ថាជា «កោះសន្តិភាព» ស្ថិតនៅចន្លោះប្រទេសផលិតកូកាអ៊ីនធំបំផុតតទីពីររបស់ពិភពលោក គឺប្រទេសប៉េរូ និងកូឡុំប៊ី។ ប៉ុន្តែកំពង់ផែទឹកជ្រៅរបស់ប្រទេសនេះ បានធ្វើឱ្យក្លាយជាចំណុចឆ្លងកាត់ដ៏សំខាន់សម្រាប់កូកាអ៊ីន ទៅកាន់អ្នកប្រើប្រាស់នៅសហរដ្ឋអាមេរិក និងនៅអឺរ៉ុប។