ប្រធានអង្គការណាតូ បាននិយាយកាលពីថ្ងៃអាទិត្យថា ការយល់ព្រមពីសភាតំណាងសហរដ្ឋអាមេរិក បន្ទាប់ពីជម្លោះជាច្រើនខែនៃកញ្ចប់ជំនួយយោធាជិត ៦១ពាន់លានដុល្លារសម្រាប់អ៊ុយក្រែន មិនទាន់យឺតពេលទេ ប៉ុន្តែការពន្យារពេលនេះ មានផលវិបាកពិតប្រាកដ។

អគ្គលេខាធិការអង្គការណាតូ លោក ចេន ស្តូលថិនប៊ឺក (Jens Stoltenberg) បានប្រាប់ទូរទស្សន៍ MSNBC របស់សហរដ្ឋអាមេរិកថា៖«ឥឡូវនេះ ប្រជាជនអ៊ុយក្រែន គឺមានរយៈពេល ៤ខែហើយដែលខ្វះខាតអាវុធនិងគ្រាប់រំសេវ»។

លោកស្តូលថិនប៊ឺក បាននិយាយថា៖«ជនជាតិរុស្ស៊ីមានគ្រាប់រំសេវជាច្រើនទៀត ហើយអ៊ុយក្រែនត្រូវបានបង្ខំឲ្យគ្រប់គ្រងគ្រាប់រំសេវរបស់ពួកគេ»។ «ប៉ុន្តែវាមិនទាន់យឺតពេលទេ។ ជនជាតិអ៊ុយក្រែន បានបង្ហាញជំនាញដ៏ធំសម្បើម ក្នុងការការពារប្រទេសរបស់ពួកគេ»។

កាលពីថ្ងៃសៅរ៍ បន្ទាប់ពីការជាប់គាំងជាច្រើនខែ សភាបានអនុម័តកញ្ចប់ជំនួយ ដែលមានតម្លៃរាប់ពាន់លានដុល្លារ ដោយសំឡេងភាគច្រើនលើសលប់របស់គណបក្សទាំងពីរ។ កញ្ចប់ជំនួយនេះ រួមបញ្ចូលទាំងការផ្គត់ផ្គង់អាវុធដែលត្រូវការជាបន្ទាន់សម្រាប់ការពារជាតិប្រឆាំងនឹងរុស្ស៊ី។ ការអនុម័តចាំបាច់របស់ព្រឹទ្ធសភា ត្រូវបានគេចាត់ទុកថា ជាក់លាក់ ហើយត្រូវបានគេរំពឹងទុក នៅពាក់កណ្តាលសប្តាហ៍។ ប្រធានាធិបតីសហរដ្ឋអាមេរិក ចូ បៃដិន (Joe Biden) ដែលជាអ្នកគាំទ្រដ៏ខ្លាំងចំពោះច្បាប់នេះ ត្រូវតែចុះហត្ថលេខាលើច្បាប់នេះ។

លោក ស្តូលថិនប៊ឺក បានសង្កត់ធ្ងន់ថា នៅមិនទាន់មានផែនការសម្រាប់វត្តមានប្រយុទ្ធរបស់ណាតូ នៅអ៊ុយក្រែន នៅឡើយទេ។ ទោះជាយ៉ាងណា ក៏ក្រុមដៃគូរបស់ណាតូ មានសិទ្ធិជួយអ៊ុយក្រែន។ បញ្ហានេះ មិនធ្វើឲ្យអង្គការណាតូ ក្លាយជាភាគីជម្លោះនោះទេ។