ភ្នំពេញ ៖ សិស្សពូកែរបស់កម្ពុជា ដណ្តើមមេដាយមាសបានច្រើនជាងគេ នៅក្នុងកម្មវិធីប្រឡងប្រជែងគណិតវិទ្យាអន្តរជាតិ IMEC (អាយមិច) នៅប្រទេសអូស្ត្រាលី ដែលនេះជាការបង្ហាញនូវមោទនភាព និងការលើកមុខមាត់ប្រទេសកម្ពុជាលើឆាតអន្តរជាតិ។

​សិស្សានុសិស្សកម្ពុជា ដែលចូលរួមកម្មវិធីប្រឡងប្រជែងគណិតវិទ្យាអន្តរជាតិ IMEC វគ្គផ្តាច់ព្រ័ត្រនៅប្រទេសអូស្ត្រាលី លើក ឡើងក្នុងកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV បន្ទាប់ពីការបញ្ចប់ការប្រឡងប្រជែងគណិតវិទ្យាអន្តរជាតិ IMEC នៅ ប្រទេសអូស្ត្រាលី នៅថ្ងៃទី ២២ ខែ មេសា ឆ្នាំ ២០២៤ នេះថា ជុំវិញការចូលរួមប្រកួតប្រជែងគណិតវិទ្យាអន្តរជាតិនេះ យើងអាចជួប បញ្ហាពិបាកខ្លះៗ ប៉ុន្តែប្រសិនយើងយកចិត្តទុកដាក់ក្នុងការរៀនសូត្រ ធ្វើឲ្យយើងអាចក្លាយជាសិស្សពូកែបាន ជាក់ស្តែងការចូលរួម ប្រកួតប្រជែងគណិតវិទ្យាជាអន្តរជាតិនេះជាដើម កម្ពុជាបានបំបែកឯកគត្តកម្ម ដោយបានដណ្តើមបានមេដាយមាសច្រើនជាងគេ ក្នុងចំណោមសិស្សរាប់រយនាក់ មកពីប្រទេសជាច្រើនដែលបានចូលរួមប្រកួតប្រជែង ។

លោកស្រី ផុន សិរីវឌ្ឍនី ដែលជាអាព្យាបាលសិស្សមកពីខេត្តព្រះសីហនុ លើកឡើងថា ដើម្បីជំរុញឲ្យកូនៗរបស់យើងអាចទៅ ចូលរួមប្រកួតប្រជែងជាអន្តរជាតិបាន, ជម្រើសសំខាន់ ត្រូវជំរុញឲ្យកូនៗចេះភាសាអង់គ្លេស, ជាង នេះទៅទៀត ត្រូវខិតខំរៀនសូត្រ ចំណេះដឹងទូទៅឲ្យបានពូកែ ទើបកូនៗរបស់យើងអាចឈានទៅប្រកួតប្រជែងលើឆាកអន្តរជាតិបាន អ្វីដែលសំខាន់ជាងនេះ, ប្រសិន រាជរដ្ឋាភិបាលគ្មានការដឹកនាំត្រឹមត្រូវ ជាពិសេសការដឹកនាំពីប្រមុខរាជរដ្ឋាភិបាលនោះទេ សិស្សានុសិស្សទូទាំងប្រទេស ក៏ដូចកូន គាត់ជាដើម ក៏មិនអាចមានឱកាសដូចថ្ងៃនេះឡើយ។

ទាក់ទិនការប្រឡងនេះ, លោក គង់ សាលីមីន អ្នកសម្របសម្រួលរៀបចំការប្រឡង នៃក្រុមហ៊ុន Bright Education Consultant and Travel លើកឡើងថា កម្មវិធី IMEC បានរៀបចំឡើងតាំងពីឆ្នាំ ២០២១ ប៉ុន្តែដោយសារវិបត្តិជំងឺកូវីដ-១៩ កម្មវិធី នេះបានរៀបចំឡើងតែក្នុងស្រុកប៉ុណ្ណោះ ។ នេះជាលើកទី១ ដែល Bright បានដឹកនាំសិស្សានុសិស្សទៅប្រឡងប្រជែងជាអន្តរជាតិ នៅអូស្ត្រាលី ដោយនៅក្នុងកម្មវិធីប្រឡងប្រជែងនេះ សិស្សានុសិស្សកម្ពុជា ដណ្តើមបានមេដាយជាច្រើនលើសប្រទេសផ្សេងៗ ដែល នេះជាការបង្ហាញនូវមោទនភាព និងការលើកមុខមាត់របស់កម្ពុជានៅលើឆាតអន្តរជាតិផងដែរ។

ជុំវិញការប្រឡងជាអន្តរជាតិនេះ, លោក គង់ សាលីមីន បានបញ្ជាក់ឲ្យដឹងថា បេក្ខជនចូលរួមវគ្គជម្រុះក្នុងស្រុក ចាប់ពីថ្នាក់ទី ៣ ដល់ទី ១២ សរុបមានចំនួន ៣៧៨ នាក់ ក្នុងនោះចំពោះសិស្សដែលឈានទៅវគ្គផ្តាច់ព្រ័ត្រ នៅប្រទេសអូស្ត្រាលី មានចំនួន ១២ នាក់ ដោយសិស្សទាំងនេះដណ្តើមបានមេដាយទាំងអស់គ្នារួមមាន មេដាយមាសចំនួន ៣, ប្រាក់ ៥, និងមេដាយសំរិទ្ធ ចំនួន ៤ នាក់ នៅក្នុងចំណោមសិស្សានុសិស្សដែលបានចូលរួមប្រឡងប្រជែងជាអន្តរជាតិសរុបប្រមាណជា ១៥០ នាក់ មកពីប្រទេសចំនួន ១០ ដោយក្នុងនោះកម្ពុជាបានដណ្តើមមេដាយមាសច្រើនជាងគេ៕

អត្ថបទ៖ សុន រ៉ាឌី