ពាណិជ្ជកម្មក្រៅប្រទេសរបស់ប្រទេសចិន បានឡើងដល់កម្រិតខ្ពស់បំផុតចំនួន ១០សែនកោដិយ័ន (ប្រហែល ១,៤១សែនកោដិដុល្លារ) ក្នុងរយៈពេល ៣ខែដំបូងនៃឆ្នាំនេះ ដោយអត្រាកំណើនឈានដល់កម្រិតខ្ពស់ក្នុងត្រីមាសទី៦ ដែលបង្ហាញឲ្យឃើញទាំងស្រុងនូវភាពធន់នៃការអភិវឌ្ឍពាណិជ្ជកម្មក្រៅប្រទេសរបស់ប្រទេសនេះ។

ខេត្ត Guangdong នៅភាគខាងត្បូងប្រទេសចិន ហើយខេត្ត Jiangsu និង Zhejiang នៅភាគខាងកើតប្រទេស ដែលជាមជ្ឍមណ្ឌលធំជាងគេបំផុតចំនួន៣ ក្នុងពាណិជ្ជកម្មក្រៅប្រទេស ក៏បានចុះបញ្ជីកំណើនពាណិជ្ជកម្មក្រៅប្រទេសគួរឲ្យកត់សម្គាល់ផងដែរ នៅក្នុងត្រីមាសទី១ នេះ។

ជាឧទាហរណ៍ ខេត្ត Guangdong បានរាយការណ៍ថា មានកម្រិតខ្ពស់បំផុតចំនួនជាង ២សែនកោដិយ័ន (ប្រហែល ២៨១,៦៧ពាន់លានដុល្លារ) នៅក្នុងពាណិជ្ជកម្មក្រៅប្រទេស រវាងខែមករា ដល់ខែមីនា ពោលគឺកើនឡើង ១២ភាគរយ បើបៀបនឹងរយៈពេលដូចគ្នាកាលពីឆ្នាំមុន ដោយជាប់ចំណាត់ថ្នាក់លេខ១ នៅក្នុងប្រទេស។ ទន្ទឹមនឹងនេះដែរ ការនាំចេញផលិតផលមេកានិច និងអគ្គិសនីរបស់ខេត្ត Jiangsu ក្នុងនោះរួមទាំងនាវា យានយន្ត និងគ្រឿងបន្លាស់ផងដែរ បានបន្តមានកំណើន ២ខ្ទង់ អំឡុងខែមករា ដល់ខែមីនា។

ជាមួយគ្នានេះ ទិន្នន័យក៏បានបង្ហាញផងដែរថា ចំនួននាំចូល និងនាំចេញ បានកើនឡើង ៨,៨ភាគរយ បើធៀបនឹងឆ្នាំមុន ក្នុងត្រីមាសទី១។ ពិសេសនោះ ការនាំចេញ និងការនាំចូលសរុបរបស់ក្រុមហ៊ុនឯកជន ឡើងដល់ ៥,៥៣សែនកោដិយ័ន (ប្រហែល ៧៧៨,៨១ពាន់លានដុល្លារ) ពោលគឺកើនឡើង ១០,៧ភាគរយ ដោយស្មើនឹង ៥៤,៣ភាគរយនៃទំហំពាណិជ្ជកម្មក្រៅប្រទេសរបស់ប្រទេស ក្នុងរយៈពេល ៣ខែ។

សហគ្រាសឯកជនបានក្លាយជាកម្លាំងចលករថ្មីនៅក្នុងនវានុវត្តន៍ និងការបង្កើតឈានមុខគេ ខណៈដែលពួកគេដើរតួនាទីជាអ្នកនាំចូល និងនាំចេញដ៏ធំបំផុតរបស់ប្រទេសនូវផលិតផលទំនើបៗ ដែលរួមចំណែកដល់ការពន្លឿនការអភិវឌ្ឍកម្លាំងផលិតភាពប្រកបដោយគុណភាពថ្មី នៅក្នុងវិស័យពាណិជ្ជកម្មក្រៅប្រទេស៕