ក្រសួងវប្បធម៌ និងវិចិត្រសិល្បៈ បើកវគ្គបណ្តុះបណ្តាលស្តីពីគរុកោសល្យ វិធីសាស្រ្តនៃការបង្រៀន និង​ការគ្រប់គ្រងថ្នាក់រៀន ជំហានទី២ ថ្ងៃទី២៣ ខែមេសា ឆ្នាំ២០២៤នេះ ។

បើតាមលោក ប៊ុនថន សុខាណារិទ្ធ នាយកស្តីទីសាលាបណ្តុះបណ្តាលក្របខ័ណ្ឌវប្បធម៌ បាន​ឲ្យ​ដឹង​ថា ជាចក្ខុវិស័យកម្មវិធីបណ្តុះបណ្តាលគ្រូនេះ ដាក់មកដើម្បីរួមចំណែកកសាងជួរគ្រូបង្រៀន ឱ្យ​មានសមត្ថភាពជំនាញសតវត្សរ៍ទី២១ ដោយផ្តោតលើចំណេះដឹងវិជ្ជាជីវៈ ជំនាញវិជ្ជាជីវៈ ក្រម​សីលធម៌​វិជ្ជាជីវៈ និងការអភិវឌ្ឍវិជ្ជាជីវៈជាប្រចាំ ដើម្បី ចូលរួមចំណែកដល់ការអភិវឌ្ឍធនធាន មនុស្សលើវិស័យ សិល្បៈ វប្បធម៌ ផង និងចំណេះដឹងទូទៅផង ឱ្យមានលក្ខណៈ​សម្បត្តិ​ពេញ​លេញ សម្រាប់​កសាងសង្គមពុទ្ធិ និង វិបុលភាព ដល់ក្មេងជំនាន់ក្រោយ។

តាមកម្មវិធីដែលបាន​គ្រោង​ទុក សម្រាប់វគ្គបណ្តុះបណ្តាលលើកនេះ សាលាបានកំណត់យកមុខវិជ្ជាធំៗ​រួមមាន៖ ទី១.​ការ​គ្រប់​គ្រងថ្នាក់រៀន (ដោយមានបែងចែកមុខវិជ្ជា ប្រភេទនិងទម្រង់នៃការរៀបចំថ្នាក់រៀន ការ​កំណត់ និង​ការប្រើប្រាស់សម្ភារៈឧបទ្ទេស និងការអនុវត្ត)។ ទី២.កិច្ចតែង​ការ​បង្រៀន​(ដោយ​មាន​បែង​ចែក​មុខវិជ្ជា ទ្រឹស្តីឬនិយមន័យទាក់ទង និងកិច្ចតែងការ ប្រភេទនៃកិច្ចតែងការ និងការ​អនុវត្ត)​។ សម្រាប់វគ្គនេះ សាលា បាន កំណត់ ជ្រើសយកលោកគ្រូ-អ្នកគ្រូ និងបុគ្គលិក​រដ្ឋបាល​សិក្សា​ដែល​ធ្លាប់​ទទួលការបណ្តុះបណ្តាលនៅជំហាន១ ក្រុម១ ឆ្នាំ២០២៣ សរុបចំនួន៨៥រូប ក្នុង​​នោះសិ​ក្ខាកាម ជាស្រ្តី មាន ចំនួន ២៥រូប មកពីសាលាមធ្យមវិចិត្រសិល្បៈ ដើម្បីយ​ក​មក​បណ្តុះ​បណ្តាល​បន្តនូវជំហាន២ ក្រុម១ នាឆ្នាំ២០២៤នេះ។

ការបើកវគ្គ​បណ្តុះ​បណ្តាល​នា​ពេល​នេះ ក្នុងគោលបំណង ផ្សាភ្ជាប់ទៅនឹងគោលនយោបាយ និងផែនការយុទ្ធសាស្រ្តស្តីពីការអប់រំ របស់​ក្រសួងអប់រំ និងយុវជន និងកីឡា និងគោលនយោបាយជាតិ ស្តីពីវប្បធម៌ ដោយផ្តោត​សំខាន់​ទៅ​លើ៖ ធានាឱ្យការអប់រំមានគុណភាព ប្រកបដោយសមធម៌ បរិយាបន្ន និងលើកកម្ពស់ ឱកាសក្នុងការសិក្សាពេញមួយជីវិតសម្រាប់ទាំងអស់គ្នា,ធានាភាពស័ក្តិសិទ្ធនៃភាពជាអ្នកដឹកនាំ និងគ្រប់គ្រង​របស់មន្រ្តីអប់រំគ្រប់លំដាប់ថ្នាក់ និងធានាគុណ​ភាព​ក្នុង​ការ​សាប​ព្រួស​ចំណេះ​ដឹង​ដល់​អ្នក​បន្ត​វេន​សិល្បៈឲ្យទទួលបានចំណេះ ជំនាញច្បាស់លាស់​អាចយក​ទៅ​បម្រើ​ដល់​កិច្ច​ការងារ​សង្គម និងជីវភាពគ្រួសារ និងរួមចំណែកក្នុងការអភិរក្ស ជំនាញមរតកដូនតាខ្មែរ។

ឯកឧត្តម ធៀង វណ្ណដារ៉ុង អនុរដ្ឋលេខាធិការក្រសួងវប្បធម៌ និងវិចិត្រសិល្បៈបានថ្លែងថា សូម​សម្ដែង​នូវ​ការ​ដឹងគុណ និងស្ញប់ស្ញែង ចំពោះវីរភាពនៃ​ការ​ដឹកនាំ​ប្រកប​ដោយ​គតិ​បណ្ឌិត​ដ៏​ខ្ពង់​ខ្ពស់​របស់​សម្ដេច​អគ្គមហាសេនាបតីតេជោ ហ៊ុន សែន ដែលបានដឹកនាំ និងកសាង​ប្រទេស​តាំង​ពី​បាត​ដៃ​ទទេ រហូតធ្វើឱ្យ ប្រទេសជាតិមានការរីកចម្រើនដូចសព្វថ្ងៃ។ ទន្ទឹមនឹងនោះដែរ រាជ​រដ្ឋាភិបាល​ថ្មី​ដែល​ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក៏បានដាក់​ចេញ​នូវ​គោល​នយោបា​យជាតិថ្មី ដើម្បីបន្តបុព្វហេតុការពារសុខសន្តិភាព និងការអភិវឌ្ឍសង្គម​ជាតិ​ឱ្យ​កាន់​តែ​រីកចម្រើនបន្ថែមទៀត។

នៅក្នុងនីតិកាលទី៧នេះ រាជរដ្ឋាភិបាលកម្ពុជា ក្រោមការ​ដឹកនាំ​ដ៏​ស្វាហាប់​របស់សម្តេចមហាបវរធិបតី ហ៊ុន ម៉ាណែត បានបន្តកំណត់យក​នយោបាយ​អភិវឌ្ឍ​ធន​ធាន​មនុស្ស ជាអាទិភាពក្នុងចំណោមអាទិភាពទាំង៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។ វគ្គ​បណ្ដុះ​បណ្ដាលនេះ ក៏ជាការបន្តរួម​ចំណែក​ធ្វើ​ឱ្យ​គោល​នយោបាយ​អាទិភាព​របស់​រាជ​រដ្ឋាភិបាល​ទទួល​បាន​ជោគជ័យ ជាពិសេសក្នុងក្របខ័ណ្ឌ នៃការ​បណ្ដុះ​បណ្ដាល​ធន​ធាន​មនុស្ស​លើ​វិស័យ​វប្បធម៌​៕ អត្ថបទ រដ្ឋា