ភ្នំពេញ ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចាក់វ៉ាក់សាំងកូវីដ-១៩ ក្នុងក្រខណ្ឌទូទាំងប្រទេស បានថ្លែងអះអាងថា មេរោគកូវីដ១៩បន្លែងថ្មីប្រភេទDeltaវានឹងបម្លែងបន្តទៅរកភាពអាក្រក់កាន់តែខ្លាំងបន្ថែមទៀត ដែលវានឹងបណ្តាលឲ្យអ្នកជំងឺអាចឆ្ពោះទៅរកភាពធ្ងន់ធ្ងរបានយ៉ាងឆាប់រហ័ស ប្រសិនបើមិនមានការប្រុងប្រយ័ត្នខ្ពស់ទេនោះ។

 ក្នុងឱកាសនាំអំណោយរបស់សម្តេចតេជោ ហ៊ុន សែន នាយរដ្ឋមន្រ្តីនៃព្រះរាជាណាចក្រកម្ពុជា ជាថវិការ៣លានរៀល និងគ្រឿងឧបភោគបរិភោគមួយចំនួនទៀត ជូនលោកតា លោកយាយ ដែលមានអាយុពី១០១ ដល់១០៤ឆ្នាំ ដែលស្ម័គ្រចិត្តចាក់វ៉ាក់សាំងបង្ការកូវីដ១៩ នៅខេត្តកំពង់ចាម និងខេត្តត្បូងឃុំនោះ លោកជំទាវឱ វណ្ណឌីន បានលើកឡើងថា រហូតមកដល់សព្វថ្ងៃនេះប្រទេសកម្ពុជាយើងមានអ្នកឆ្លងមេរោគកូវីដ១៩បម្លែងថ្មី រាប់រយនាក់ហើយ ហើយបើតាមអ្នកជំនាញអះអាងថា មេរោគបម្លែងថ្មីនេះវានឹងវិវត្តន៍ទៅរកភាពធ្ងន់ធធ្ងរយ៉ាងឆាប់រហ័សផងដែរ ពោលប្រសិនបើយើងធ្វើការទប់ស្កាត់មិនបានទាន់ពេលវេលាទេនោះវានឹងកាន់តែឆក់យកជីវិតយើងបានយ៉ាងលឿនផងដែរ។

​បើតាមការបញ្ជាក់របស់អ្នកនាំពាក្យរបស់ក្រសួងសុខាភិបាលនេះផងដែរបានឲ្យដឹងទៀតថាមេរោគកូវីដ១៩បន្លែងថ្មីប្រភេទDeltaនេះគឺវាបានកើតឡើងច្រើននៅតាមបណ្តាខេត្តដែលជាប់នឹងព្រំដែនរវាងប្រទេសកម្ពុជា និងថៃខណៈដែលបងប្អូនពលករខ្មែរយើងបានវិលមកពីប្រទេសថៃវិញនោះ។ ទោះជាយ៉ាងនេះក្តីលោកជំទាវឱ វណ្ណឌីន បានសង្កត់ធ្ងន់ផងដែរថា ប្រសិនបើយើងមានការធ្វេសប្រហែសបន្តទៀតនោះមេរោគបន្លែងថ្មីប្រភេទDeltaនេះនឹងអាចឆ្លងចូលក្នុងសហគមន៍កាន់តែខ្លាំង ដោយសារតែមេរោគនេះវាមិនងាយរកឃើញវាដូចមេរោគកូវីដ១៩ធម្មតានោះឡើយ។

​ជាមួយគ្នានោះដែរ លោកជំទាវ ឱ វណ្ណឌីនក៏បានបន្តអំពាវនាវយ៉ាងទទួចដល់បងប្អូនជនរួមជាតិទំាងអស់ មេត្តាប្រុងប្រយ័ត្នឲ្យបានខ្ពស់បន្ថែមទៀត ដោយមិនត្រូវភ្លេចកិច្ចការពារនូវវិធានការ៣កុំ និង៣ការពារនោះឡើយ ដើម្បីធ្វើយ៉ាងណាឲ្យប្រទេសកម្ពុជាយើងឆាប់វិលត្រឡប់ទៅរកសភាពដើមវិញ ខណៈស្ថានការណ៍បច្ចុប្បន្នមេរោគកូវីដ១៩បានបំផ្លាញសុខភាព និងអាយុជីវិតរបស់បងប្អូនពលរដ្ឋខ្មែរយើងកាន់តែច្រើនទៅពីមួយថ្ងៃទៅមួយថ្ងៃនោះ៕អត្ថបទ ៖ ចក់