អំឡុងពេលនេះយុវជនច្រើនបាននាំគ្នាចុះឈ្មោះរៀនជំនាញវិជ្ជាជីវៈ ក្នុង​កម្ម​វិធី​ផ្តល់​អាហារូប​ករណ៍​​របស់រាជរដ្ឋាភិបាល សម្រាប់ការបណ្តុះបណ្តាលជំនាញវិជ្ជាជីវៈ និងបច្ចេកទេស ១លាន​៥​សែន​នាក់ ដំណាក់កាលទី២ នៅតាមបណ្តាសាលាបណ្តុះបណ្តាលជំនាញវិជ្ជាជីវៈ TVET ក្រសួង​ការងារ និងបណ្តុះបណ្តាលវិជ្ជាជីវៈ។

ក្រុមយុវជនបានថ្លែងប្រាប់ BTV នៅថ្ងៃទី២៣ ខែមេសានេះថា ក្រោយ​ពី​ទទួល​បាន​ដំណឹង​តាម​រយៈ​ប្រព័ន្ធ​ផ្សព្វផ្សាយព័ត៌មាន និងមានការសម្របសម្រួលល្អ ពីអាជ្ញាធរឃុំសង្កាត់ នៅពេល​នេះ​ពួក​គេ​បាន​សម្រេចចិត្តនាំគ្នាមកចុះឈ្មោះរៀនសូត្រ​ជំនាញ​វិជ្ជាជីវៈ​ទៅ​តាម​ជំនាញ​ដែល​ខ្លួន​ស្រឡាញ់ នៅវិទ្យាស្ថានពហុបច្ចេកទេសតេជោសែន ក្រុងតាខ្មៅ ខេត្តកណ្តាល ដើម្បីមាន​ជំនាញ​ច្បាស់​លាស់​មួយទុកជាទុននៅក្នុងខ្លួន ងាយស្រួលស្វែងរកការងារធ្វើ និងងាយបង្កើត​មុខ​របរ​ផ្ទាល់​ខ្លួន​ទៅ​ថ្ងៃ​អនាគត។

ក្រុមការងារ វិទ្យាស្ថានពហុបច្ចេកទេសតេជោសែន ក្រុងតាខ្មៅ ថ្លែងថា ក្រោយពីក្រសួងការងារ បណ្តុះ​បណ្តាលវិជ្ជាជីវៈ បានប្រកាសជ្រើសរើសសិស្ស ជាពិសេស យុវជន យុវនារី ស្ថិតក្នុង​បន្ទុក​គ្រួសារ​ក្រីក្រ និងគ្រួសារងាយរងហានីភ័យ ចូលរៀនជំនាញវិជ្ជាជីវៈ ថ្នាក់អាហារូបករណ៍ នៃកម្ម​វិធី​បណ្តុះ​បណ្តាលជំនាញវិជ្ជាជីវៈនិងបច្ចេទេស ជូនយុវជន ១.៥ លាននាក់ របស់រាជរដ្ឋាភិបាល​ដំណាក់​កាល​ទី២ នៅពេលនេះ មានយុវជនជាច្រើន បាននាំគ្នាមកចុះឈ្មោះចូលរៀនជាហូរហែរ នៅ​វិទ្យាស្ថានពហុបច្ចេកទេសតេជោសែន ក្រុងតាខ្មៅ។

សូមបញ្ជាក់ថា នៅក្នុងដំណាក់កាលទី១ នៃការអនុវត្ត​កម្ម​វិធី​ផ្តល់​អាហា​រូបករណ៍​រាជ​រដ្ឋាភិបាល​សម្រាប់​ការ​បណ្តុះបណ្តាលវិជ្ជាជីវៈ និងបច្ចេកទេស ជូនយុវជនស្ថិតក្នុងបន្ទុកគ្រួសារក្រីក្រ និង​គ្រួសារ​ងាយ​រងហានីភ័យ ១.៥លាននាក់ ដែលបានចាប់ផ្តើមកាលពីថ្ងៃទី១៥ ខែមករា ឆ្នាំ​២០២៤​មក​នោះ គឺ ក្រសួងការងារ និងបណ្តុះបណ្តាលវិជ្ជាជីវៈ បាន​ទទួល​សិស្ស​ចុះ​ឈ្មោះ​ចូល​រៀន​ជំនាញ​បាន​ចំនួន ជាង១ម៉ឺន ៦ពាន់នាក់ សរុបមានចំនួន ៥៤៤ថ្នាក់រៀន ហើយនៅពេលនេះ តាមបណ្តាសាលាTVET បាននិងកំពុងបន្តជ្រើសរើសសិស្សចុះឈ្មោះចូលរៀនចូលរៀនជំនាញ ដំណាក់កាលទី២ ហើយនឹងមានផ្តល់ប្រាក់ឧបត្ថម្ភប្រចាំខែ២៨ម៉ឺនរៀល ករណី​សិស្ស​យក​បណ្ណ​ក្រីក្រ​របស់​អាណាព្យាបាល មកចុះឈ្មោះចូលរៀន៕ អត្ថបទ ស៊ុម សុខជា