មេដឹកនាំប៉ាគីស្ថាន និងអ៊ីរ៉ង់កាលពីថ្ងៃចន្ទ បានប្តេជ្ញាពង្រឹងទំនាក់ទំនង និងបង្កើនពាណិជ្ជកម្មទ្វេភាគីដល់ ១០ពាន់លានដុល្លារ ក្នុងមួយឆ្នាំ បន្ទាប់ពីមានការវាយប្រហារតាមអាកាសនាពេលថ្មីៗនេះប្រឆាំងនឹងគ្នាទៅវិញទៅមក និងមិនអើពើនឹងទណ្ឌកម្មថ្មី ដែលអាចកើតមានប្រឆាំងនឹងសាធារណរដ្ឋពែរ្សនេះ។

ប្រធានាធិបតីអ៊ីរ៉ង់លោក អ៊ីប្រាហ៊ីម រ៉េស៊ី ( Ebrahim Raisi) បាននិយាយនៅក្នុងសន្និសីទសារព័ត៌មានជាមួយនាយករដ្ឋមន្រ្តីប៉ាគីស្ថាន លោក សេបាស សារិហ្វ (Shehbaz Sharif) នៅក្នុងទីក្រុងអ៊ីស្លាម៉ា បាដថា៖«យើងបានយល់ព្រមបង្កើនទំហំពាណិជ្ជកម្មទ្វេភាគីរបស់យើងឲ្យដល់ ១០ពាន់លានដុល្លារ (ក្នុងមួយឆ្នាំ)»។

លោករ៉េស៊ី ដែលបានមកដល់ប្រទេសប៉ាគីស្ថានក្នុងដំណើរទស្សនកិច្ចរយៈពេលបីថ្ងៃ បានអំពាវនាវឲ្យ មានសកម្មភាពបន្ថែមទៀត នៅព្រំដែន ដើម្បីបង្កើនពាណិជ្ជកម្មជាមួយប៉ាគីស្ថាន ក្នុងការប្រឆាំងនឹងការដាក់ទណ្ឌកម្ម «ខុសច្បាប់និងអយុត្តិធម៌» ដោយលោកខាងលិចប្រឆាំងនឹងប្រទេសរបស់លោក។

លោកសារិហ្វ បាននិយាយថា៖«ពេលវេលា បានមកដល់ហើយ ដើម្បីអភិវឌ្ឍន៍ព្រំដែនរួមរបស់យើងឲ្យក្លាយជាមជ្ឈមណ្ឌលពាណិជ្ជកម្ម និងមានការរីកចម្រើន» ដោយបានលើកឡើងពីទស្សនៈវិស័យរបស់លោក រ៉េស៊ី។

ការអត្ថាធិប្បាយនេះ បានធ្វើឡើង បន្ទាប់ពីមេដឹកនាំទាំងពីរ បានធ្វើជាសាក្សីក្នុងការចុះហត្ថលេខាលើកិច្ចព្រមព្រៀងយ៉ាងហោចណាស់ចំនួន ៨ស្តីពីសន្តិសុខ ពាណិជ្ជកម្ម ថាមពល និងវប្បធម៌។

លោក រ៉េស៊ី បានធ្វើទស្សនកិច្ចប្រទេសប៉ាគីស្ថាន រយៈពេលប៉ុន្មានខែបន្ទាប់ពីអ្នកជិតខាងទាំងពីរ បានបើកការវាយប្រហារតាមអាកាសជាការសងសឹកចូលទៅក្នុងទឹកដីរបស់គ្នាទៅវិញទៅមក។