​បាល់ទាត់៖ បន្ទាប់ពី​ផ្អាក​ការប្រកួត​មួយរយៈ​ពេល​ធំដោយ​វិបត្តិ​កូ​វីដ​-១៩ ការប្រកួត​បាល់ទាត់​ដណ្ដើម​ពានរង្វាន់​សម្ដេច​តេ​ជោ ហ៊ុន សែន ឬ​ពាន Hun Sen Cup (​ថ្នាក់​ខេត្ត​) លើក​ទី​១៥ ឆ្នាំ​២០២១ នឹង​ត្រឡប់មកវិញនា​ដើម​សប្ដាហ៍​ក្រោយ​នេះហើយ ប៉ុន្ដែ​នៅសល់​បេក្ខភាព​ត្រឹម ១០​ក្រុម​ប៉ុណ្ណោះបន្ទាប់ពី​ក្រុម​ជាច្រើន​បាន​ដកខ្លួន។​

​ចំពោះ​ក្រុម​នៅសល់ដែល​ត្រូវ​បន្ដ​ប្រកួតប្រជែង ​ដណ្ដើម​ជើងឯក​ពាន​សម្ដេច​តេ​ជោ​-​ថ្នាក់​ខេត្ត រួមមាន​ពូ​ល A មាន​ក្រុម​ភ្នំពេញ​ហ្គា​ឡាក់​ស៊ី និង​ខេត្តកំពង់ឆ្នាំង​, ពូ​ល ​B មាន​ខេត្តបន្ទាយមាន ជ័យ និង​ខេត្តបាត់ដំបង​, ពូ​ល​ C មាន​ខេត្តសៀមរាប និង​ខេត្ដ​ឧត្ដរមានជ័យ​, ពូ​ល D នៅសល់​ក្រុម​បាត​តារាង​ខេត្តកណ្ដាល​មួយ​ប៉ុណ្ណោះ​, ពូ​ល E មាន​ក្រុម​កំពូល​តារាង​ខេត្តកោះកុង និង​ក្រុម​បាត​តារាង​ខេត្តកំពត និង​ពូ​ល F នៅសល់​ក្រុម​កំពូល​តារាង​ខេត្ត​ត្បូងឃ្មុំ។​ ​តាម​ការបញ្ជាក់​របស់​មន្ដ្រី​គណៈកម្មការ​ប្រកួត​បាល់​ទាត់​ជាតិ​កម្ពុជា​ (CNCC) បាន​ឲ្យ​ដឹងថា ដោយសារ​នៅ​សល់​ត្រឹម ១០​ក្រុម គណៈកម្មការ​ក៏​សម្រេច​កែប្រែ​ប្រព័ន្ធ​ប្រកួត​ថ្មី ហើយក៏​ទទួលបាន​ការឯក​ភាព​ពី​ក្រុម​នីមួយៗផងដែរ ក្នុងនោះ​មាន ២​ពូ​លដែល​ត្រូវ​ប្រកួត​កំណត់​ក្រុម​លេខ​១ និង​លេខ​២ គឺ​ពូ​ល A ក្រុម​ភ្នំពេញ​ហ្គា​ឡាក់​ស៊ីត្រូវ​ជួប​ខេត្តកំពង់ឆ្នាំង និង​ពូ​ល C ខេត្តសៀមរាបត្រូវ​ជួប​ខេត្តឧត្ដរមានជ័យនា​ថ្ងៃទី​០៣ ខែសីហា​ខាងមុខនេះ។​

​ក្រោយ​បញ្ចប់​ការប្រកួត​ពូ​ល​ទាំងពីរ​រួច សម្រាប់​ក្រុម​ឈ្នះនឹង​ទទួលបាន​កៅអី​វគ្គ ៨​ក្រុម​ចុងក្រោយ។ រីឯ​ក្រុម​ចាញ់នឹងត្រូវ​ប្រកួត​វគ្គ​ជម្រុះ Play-Off ជាមួយ​ក្រុម​លេខ​២ នៃ​ពូ​ល ២ ផ្សេងទៀត ក្នុងនោះ​ក្រុម​ចាញ់​រវាង​ភ្នំពេញ​ហ្គា​ឡាក់​ស៊ី និង​ខេត្តកំពង់ឆ្នាំងនឹងត្រូវ​ជួប​ក្រុម​លេខ​២ ពូ​ល E គឺ​ខេត្តកំពត ខណៈ​ក្រុម​ចាញ់​រវាង​ខេត្តសៀមរាប និង​ខេត្តឧត្ដរមានជ័យនឹងត្រូវ​ជួប​ក្រុម​លេខ​២ នៃ​ពូ​ល B គឺ​ក្រុម​ស​.​ស​.​យ​.​ក ខេត្តបាត់ដំបងនា​ថ្ងៃទី​០៦ ខែសីហា ដើម្បី​ចម្រាញ់​យក​ក្រុម​ឈ្នះ ២​ក្រុម​ទៀតឡើងទៅ​បង្គ្រប់​កៅអី​វគ្គ ៨​ក្រុម​ចុងក្រោយ។​ ​ដោយឡែក ៤​ក្រុម​ផ្សេងទៀតដែល​មិនបាន​ប្រកួតនឹង​ឈរ​ចាំ​នៅ​វគ្គ ៨​ក្រុម​ចុងក្រោយ​ដោយ​ស្វ័យ​ប្រ​វ​ត្ដិ រួមមាន​ខេត្តបន្ទាយមានជ័យក្រុម​លេខ​១ ពូ​ល B, ខេត្តកណ្ដាលក្រុម​លេខ​១ ពូ​ល D, ខេត្តកោះកុងក្រុម​លេខ​១ ពូ​ល E, និង​ខេត្ត​ត្បូងឃ្មុំក្រុម​លេខ​១ ពូ​ល F។ ចំពោះ​កម្មវិធី​ប្រកួត​វគ្គ ៨​ក្រុម​ចុងក្រោយ គ្រោង​ធ្វើឡើង ១​ជើង​ប៉ុណ្ណោះនា​ថ្ងៃទី​១០ និង​ថ្ងៃទី​១១ ខែសីហាដើម្បី​ស្វែងរក​បេក្ខភាព​វគ្គ​ពាក់កណ្ដាល​ផ្ដាច់ព្រ័ត្រនៃ​ពាន​សម្ដេច​តេ​ជោ​-​ថ្នាក់​ខេត្តដែល​គ្រោង​ប្រកួត​នា​ថ្ងៃទី​១៧ ខែសីហា និង​វគ្គ​ផ្ដាច់ព្រ័ត្រនឹង​ប្រកួត​នា​ថ្ងៃទី​២១ ខែសីហា ឆ្នាំ​២០២១ ខាងមុខ៕

​អត្ថបទ៖ លី ឈុន​ឡា