ក្រសួងការបរទេសអាមេរិក បាននិយាយកាលពីថ្ងៃចន្ទ (២២ មេសា) ថាក្រុមមន្ត្រីសហរដ្ឋអាមេរិក និងកូរ៉េខាងត្បូង នឹងជួបប្រជុំគ្នានៅកោះហាវ៉ៃ ក្នុងសប្តាហ៍នេះសម្រាប់កិច្ចពិភាក្សាស្តីពីការចែករំលែកតម្លៃចំណាយលើការទុកកងទ័ពអាមេរិកនៅក្នុងប្រទេសកូរ៉េខាងត្បូង ដោយសហរដ្ឋអាមេរិក កំពុងស្វះស្វែងរក «លទ្ធផលដោយយុត្តិធម៌ និងសមធម៌» ដែលនឹងពង្រឹងសម្ព័ន្ធភាពរវាងប្រទេសទាំងពីរបន្ថែមទៀត។
ភាគីទាំងពីរបានតែងតាំងបេសកជនកាលពីខែមុន ដើម្បីចាប់ផ្តើមកិច្ចពិភាក្សាដំបូងសម្រាប់កិច្ចព្រមព្រៀងថ្មីដែលនឹងចូលជាធរមានក្នុងឆ្នាំ២០២៦។ ប្រព័ន្ធផ្សព្វផ្សាយកូរ៉េខាងត្បូង និយាយថា គោលបំណងគឺឱ្យមានកិច្ចព្រមព្រៀងមួយមុនពេលការបោះឆ្នោតនៅខែវិច្ឆិកា ដោយលោកអតីតប្រធានាធិបតី ដូណាល់ ត្រាំ (Donald Trump) បានចោទប្រកាន់ទីក្រុងសេអ៊ូល ថា «កេងចំណេញ» លើកម្លាំងយោធាអាមេរិក។
ក្រសួងការបរទេសនិយាយថា កិច្ចប្រជុំលើកដំបូងស្តីពីកិច្ចព្រមព្រៀងវិធានការពិសេសកូរ៉េខាងត្បូង-សហរដ្ឋអាមេរិក លើកទី១២ នេះនឹងត្រូវធ្វើឡើងនៅទីក្រុង ហូណូលូលូ (Honolulu) របស់សហរដ្ឋអាមេរិក ពីថ្ងៃអង្គារ (២៣ មេសា) ដល់ថ្ងៃព្រហស្បតិ៍ (២៤ មេសា)។ ទាហានអាមេរិកជាង ២៨.០០០ នាក់កំពុងឈរជើងនៅកូរ៉េខាងត្បូង ដែលជាផ្នែកនៃកិច្ចខិតខំប្រឹងប្រែងដើម្បីរារាំងការគំរាមកំហែងនុយក្លេអ៊ែរពីកូរ៉េខាងជើង។
កូរ៉េខាងត្បូង បានចាប់ផ្តើមរែកពុនលើការចំណាយក្នុងការដាក់ពង្រាយកងកម្លាំង ប្រើមូលនិធិដែលផ្ដល់ដល់កម្លាំងពលកម្មក្នុងស្រុក ការសាងសង់ការដំឡើងយោធា និងការគាំទ្រផ្នែកដឹកជញ្ជូនផ្សេងទៀតនៅដើមទសវត្សរ៍ឆ្នាំ១៩៩០៕