ខណៈវគ្គបណ្តុះបណ្តាលជំនាញវិជ្ជាជីវៈលើកទី២ ស្តីពី Sequence Control ត្រូវបានបញ្ចប់ដោយជោគជ័យ ដោយមានសិក្ខាកាមចំនួន ២៥នាក់ មកពី ៦ប្រទេស នៃបណ្តាប្រទេសអាស៊ាន នៅខែមិថុនា ឆ្នាំ២០២៤ខាងមុខនេះ ក្រសួងការងារ និងបណ្តុះបណ្តាលវិជ្ជាជីវៈ សហការជាមួយសភាពាណិជ្ជកម្ម និងឧស្សាហកម្មកូរ៉េ នឹងបន្តបើកវគ្គសិក្សានេះជាលើកទី៣បន្តទៀតនៅកម្ពុជា ដើម្បីលើកកម្ពស់ជំនាញបច្ចេកទេសឱ្យដើរទាន់ឧស្សាហ៍កម្ម ៤.០។
ឯកឧត្តមបណ្ឌិត ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានអប់រំបណ្តុះបណ្តាលបច្ចេកទេសនិងវិជ្ជាជីវៈ នៃក្រសួងការងារ និងបណ្តុះបណ្តាលវិជ្ជាជីវៈ នៅក្នុងពិធីបិទវគ្គបណ្តុះបណ្តាល ក្រោមគម្រោង ASEAN-ROK TVET Mobility Programme នៅព្រឹកថ្ងៃទី២៣ ខែមេសានេះ បានមានប្រសាសន៍ថា វគ្គបណ្តុះបណ្តាលជំនាន់ទី២ នេះមានសិក្ខាកាមចូលរួមចំនួន ២៥នាក់ ក្នុងនោះសិក្ខាកាមជាគ្រូចំនួន៩នាក់ និងសិស្សចំនួន ១៦នាក់ មកពី៦ប្រទេសផ្សេងគ្នា រួមមាន ៩នាក់ មកពីប្រទេសកម្ពុជា, ២នាក់ មកពីប្រទេសប្រ៊ុយនេ, ៣នាក់ មកពីប្រទេសឥណ្ឌូនេស៊ី, ៤នាក់ មកពីប្រទេសភូមា, ៥នាក់ មកពីប្រទេសហ្វីលីភីន និង ២នាក់ មកពីប្រទេសវៀតណាម។ លោកបានបន្តថា វគ្គបណ្តុះបណ្តាលនេះ មានរយៈពេល ៣ខែ ចាប់ពីថ្ងៃទី៣១ ខែមករា ដល់ថ្ងៃទី២៣ ខែមេសា ឆ្នាំ២០២៤ ក្នុងនោះរយៈពេល ២ខែសិក្សានៅវិទ្យាស្ថានពហុបច្ចេកទេសព្រះកុសុមៈ និងរយៈពេល ១ខែ ត្រូវអនុវត្តការងារជាក់ស្តែងនៅតាមរោងចក្រ សហគ្រាស។
សិក្ខាកាមកម្ពុជា ២រូប កញ្ញា ប៉ាន ណាវី និងលោក ឃត ច័ន្ទសុភ័ក្តត្រា និស្សិតឆ្នាំទី៥ ជំនាញផ្នែកអគ្គិសនីដូចគ្នា នៃវិទ្យាស្ថានពហុបច្ចេកទេសព្រះកុសុមៈ បានលើកឡើងថា ពិតជាអារម្មណ៍រំភើបសប្បាយរីករាយ ដែលបានចូលរួមក្នុងវគ្គសិក្សានេះ ពីព្រោះទទួលបានបទពិសោធន៍ជាច្រើនក្នុងវិស័យបណ្តុះបណ្តាលជំនាញបច្ចេកទេស និងវិជ្ជាជីវៈ ក៏ដូចជាការពង្រីកទំនាក់ទំនងរវាងកម្ពុជា និងសិក្ខាកាមនានាមកបណ្តាប្រទេសក្នុងតំបន់អាស៊ាន។ ជាពិសេស ទទួលបាននូវចំណេះដឹង និងជំនាញក្នុងការសរសេរកម្មវិធី PLC program ដើម្បីធ្វើឱ្យប្រតិបត្តិការនៃប្រព័ន្ធគ្រប់គ្រងស្វ័យប្រវត្តិកម្មនៅក្នុងគម្រោងឧស្សាហកម្ម ឬខ្សែសង្វាក់ផលិតកម្មប្រកបដោយប្រសិទ្ធភាពខ្ពស់។
សូមជម្រាបជូនថា គម្រោង ASEAN-ROK TVET Mobility Programme នេះ ត្រូវបានចុះកិច្ចព្រមព្រៀងដោយក្រសួងការងារ និងបណ្តុះបណ្តាលវិជ្ជាជីវៈ ជាមួយនឹងសភាពាណិជ្ជកម្ម និងឧស្សាហកម្មកូរ៉េ នៃសាធារណរដ្ឋកូរ៉េ The Korea Chamer of Commerce and Industry (KCCI) និងវិទ្យាស្ថានពហុបច្ចេកទេសព្រះកុសុមៈ នៃក្រសួងការងារ និងបណ្តុះបណ្តាលវិជ្ជាជីវៈ ជាអ្នកអនុវត្តគម្រោង។ គម្រោងនេះដែរ ត្រូវបានរៀបចំឡើងដើម្បីពង្រឹងកម្មវិធី TVET ក្នុងបណ្តាប្រទេសជាសមាជិកអាស៊ាន និងកាត់បន្ថយគម្លាតនៃសមត្ថភាពការងារក្នុងចំណោមប្រទេសនានានៃតំបន់អាស៊ាន តាមរយៈការអនុវត្តគម្រោង ASEAN-ROK TVET Mobility Programmes ៕
អត្ថបទ៖ ឈិត បូរ៉ាវី