ភ្នំពេញ ៖ កាកបាទក្រហមកម្ពុជាបានផ្ដល់អំណោយជាលើកទី៤ ដល់អង្គការផ្ទះបាយកុមារ ដើម្បីគាំទ្រដល់កុមារកំព្រា កុមារមកពីគ្រួសារក្រីក្រ កុមារផ្ទុកមេរោគអេដស៍ កុមាររើសអេតចាយ ប្រមាណជាង៦០០នាក់ ស្ថិតនៅបរិវេណសាលាបឋមសិក្សាជ័យជំនះ ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ កាលពីព្រឹកថ្ងៃទី២៣ ខែមេសា ឆ្នាំ២០២៤នេះ។

អគ្គលេខាធិការ កាកបាទក្រហមកម្ពុជា លោកជំទាវ ពុំ ចន្ទីនី បានសម្ដែងនូវក្ដីសប្បាយរីករាយ ដែលបានឃើញនូវការយកចិត្តទុកដាក់របស់អង្គការ ចំពោះកុមាររងគ្រោះ និងងាយរងគ្រោះទាំងនេះ។ លោកជំទាវបញ្ជាក់ថា កាកបាទក្រហមកម្ពុជានៅតែបន្តគាំទ្រ និងជួយដល់ជនងាយរងគ្រោះបន្តទៀត។ លោកជំទាវថ្លែងបញ្ជាក់ថា ដូចយើងដឹងស្រាប់ហើយ កាកបាទក្រហមកម្ពុជា តែងបានទទួលថវិការពីសប្បុរសជន នៅក្នុងទិវាពិភពលោកកាកបាទក្រហម អឌ្ឍចន្ទក្រហម ៨ឧសភា។ ដូច្នេះនៅក្នុងការដែលយើងបានទទួលថវិការមកនេះ យើងតែងមានសកម្មភាព ជួយដល់បងប្អូនប្រជាពលរដ្ឋ ដែលងាយរងគ្រោះបំផុត ហើយនៅទីនេះ គឺអាចនិយាយបានថា ងាយរងគ្រោះបំផុត ហើយពួកគាត់ទាំងនេះភាគច្រើន សុទ្ឋតែកុមារតូចៗមកពី គ្រួសារដែលមានជីវភាពខ្វះខាត។

លោក សែម ស៊ីណាត អគ្គលេខាធិការនៃអង្គការផ្ទះបាយកុមារ បានថ្លែងអំណរគុណចំពោះ កាកបាទក្រហមកម្ពុជាដែលបានគិតគូរពីសុខទុក្ខព្រមទាំងបាន ឧបត្ថម្ភនូវថវិកា និងគ្រឿងឧបភោគបរិភោគជាបន្តបន្ទាប់មកផ្ទះបាយកុមារ។ លោកបានបញ្ជាក់ពីគោលបំណងរបស់ អង្គការផ្ទះបាយកុមារ គឺជួយដល់កុមារទុរគតទាំងឡាយ ឱ្យទទួលបានការហូបចុកគ្រប់គ្រាន់ ជៀសផុតពីជំងឺនានា ហើយទទួលបានការសិក្សារៀនសូត្រ និងជៀសផុតពីគ្រឿងញៀន។ ជាក់ស្តែងដូចជារូបលោកផ្ទាល់ និងមានយុវជនជាច្រើននាក់ទៀត ដែលធ្លាប់ជ្រកក្រោមដំបូលអង្គការផ្ទះបាយកុមារ បានចូលរៀនដល់ថ្នាក់មហាវិទ្យាល័យ មានការងារធ្វើសមរម្យ ហើយមានអ្នកខ្លះទៀត ក៏បានស្ម័គ្រចិត្តមកជួយដល់កុមារតូចៗជំនាន់ក្រោយ នៅក្នុងអង្គការវិញដែរ។

​សូមជម្រាបថា អំណោយដែល កាកបាទក្រហមកម្ពុជា ផ្តល់ជូនដល់អង្គការផ្ទះបាយកុមារនៅពេលនេះរួមមាន គ្រឿងឧបភោគបរិភោគ សម្ភារប្រើប្រាស់ និងថវិកាចំនួន ១០លានរៀល អង្ករ៣តោន និងគ្រឿងឧបភោគបរិភោសំខាន់ៗជាច្រើនទៀត។ ដោយឡែកកុមារតូចៗជាង៣០០នាក់ ដែលបានមកចូលរួមផ្ទាល់ ក្នុងម្នាក់ៗទទួលបានអាហារមួយប្រអប់ អង្ករ១០គីឡូ ក្រាម មី៥កញ្ចប់ ទឹកស៊ីអ៊ីវ១ដប ទឹកសុទ្ឋ១ដប កូកាកូឡា១កំប៉ុង និងសៀវភៅប៊ិច៕

អត្ថបទ ៖ សំ ងីម