យោធាប៉ាគីស្ថាន បាននិយាយកាលពីថ្ងៃចន្ទ (២២ មេសា) ថាកងកម្លាំងសន្តិសុខប៉ាគីស្ថាន បានសម្លាប់ភេរវករ ១១ នាក់នៅក្នុងប្រតិបត្តិការពីរដាច់ដោយឡែកពីគ្នានៅក្នុងខេត្ត ខាយប័រ ផាកទុនខ្វា (Khyber Pakhtunkhwa) ភាគពាយព្យរបស់ប្រទេស។
កងកម្លាំងសន្តិសុខបានធ្វើប្រតិបត្តិការដែលមានមូលដ្ឋានលើការស៊ើបការណ៍សម្ងាត់នៅក្នុងស្រុក ដេរ៉ា អ៊ីស្មែលខាន់ (Dera Ismail Khan) និងស្រុក ណស វ៉ាហ្ស៊ីរីស្ថាន (North Waziristan) នេះបើតាមផ្នែកទំនាក់ទំនងសាធារណៈអន្តរសេវាកម្ម (ISPR) ដែលជាស្លាបប្រព័ន្ធផ្សព្វផ្សាយរបស់កងទ័ពប៉ាគីស្ថាន បាននិយាយនៅក្នុងសេចក្តីថ្លែងការណ៍មួយ។
យោងតាមសេចក្តីថ្លែងការណ៍នោះបានឱ្យដឹងថា ក្នុងអំឡុងប្រតិបត្តិការលើកដំបូង ភេរវករ ១០នាក់ ត្រូវបានសម្លាប់ បន្ទាប់ពីមានការបាញ់ប្រហារគ្នាយ៉ាងខ្លាំងក្លារវាងកងកម្លាំងសន្តិសុខ និងភេរវករនៅក្នុងស្រុក ដេរ៉ា អ៊ីស្មែលខាន់។ នៅក្នុងប្រតិបត្តិការដាច់ដោយឡែកមួយនៅស្រុក ណស វ៉ាហ្ស៊ីរីស្ថាន កងកម្លាំងសន្តិសុខបានចូលរួមយ៉ាងមានប្រសិទ្ធភាពលើទីតាំងភេរវករ ដោយបានសម្លាប់ភេរវករម្នាក់នៅនឹងកន្លែង។
ទីភ្នាក់ងារ ISPR បាននិយាយថា សព្វាវុធ និងគ្រាប់រំសេវក៏ត្រូវបានប្រមូលមកវិញក្នុងអំឡុងពេលប្រតិបត្តិការ ដោយបន្ថែមថាភេរវករដែលត្រូវបានសម្លាប់នោះ បានចូលរួមយ៉ាងសកម្មក្នុងសកម្មភាពភេរវករជាច្រើនប្រឆាំងនឹងកងកម្លាំងសន្តិសុខ ក៏ដូចជាជនស៊ីវិលស្លូតត្រង់ផងដែរ៕