យោធាប្រទេសស៊ុយអែត ធ្វើសមយុទ្ធជាលើកដំបូងនៅលើកោះសមុទ្របាល់ទិក ចាប់តាំងពីប្រទេសនេះចូលជាសមាជិកសម្ព័ន្ធយោធាណាតូកាលពីខែមុន។ យោធាស៊ុយអែត កំពុងពង្រឹងការការពាររបស់ខ្លួន ក្នុងពេលដែលរុស្ស៊ីកំពុងបន្តការវាយលុកលើអ៊ុយក្រែន។ សមយុទ្ធនេះ ត្រូវបានធ្វើឡើងនៅលើកោះ Gotland ហើយបានបើកចំហចំពោះប្រព័ន្ធផ្សព្វផ្សាយកាលពីថ្ងៃចន្ទ។ កោះដែលមានប្រជាជនជាង ៦០.០០០នាក់ មានទីតាំងស្ថិតនៅកណ្តាលនៃ សមុទ្របាល់ទិក និងជាចំណុចយុទ្ធសាស្ត្រដ៏សំខាន់។

កោះនេះក៏មានសារៈសំខាន់ជាយុទ្ធសាស្ត្រ សម្រាប់សម្ព័ន្ធយោធាណាតូ ដែលមានគោលបំណងការពារប្រទេសនៅតំបន់បាល់ទិកចំនួនបីដែលនៅក្បែរនោះមាន ប្រទេសអេស្តូនី ឡាតវី និងប្រទេសលីទុយអានី។ ប្រទេសទាំងបី សុទ្ធតែជាសមាជិកនៃសម្ព័ន្ធយោធានេះ ហើយពួកគេបានបង្កើនការប្រុងប្រយ័ត្នចំពោះរុស្ស៊ី។ 

សមយុទ្ធ ដែលត្រូវបានរៀបចំឡើងដើម្បីក្លែងប្រដូចឆ្លើយតបទៅនឹងការចូលចតរបស់កងទ័ពរុស្ស៊ីនៅលើកោះនេះ ដោយមានការចូលរួមពីទាហានស៊ុយអែតប្រហែល ២០០នាក់ ដែលឈរជើងនៅទីនោះ។ វារួមមានទាំងសមយុទ្ធបាញ់គ្រាប់ពិត និងសមយុទ្ធបាញ់ផ្លោងចូលរួមដោយរថក្រោះ ជាប្រភេទដូចគ្នាទៅនឹងរថក្រោះដែលត្រូវបានផ្តល់ទៅឱ្យអ៊ុយក្រែន។

លោក Andreas Lunde ដែលបានបញ្ជាការធ្វើសមយុទ្ធនេះ និយាយថា ការគំរាមកំហែងចំពោះ កោះ Gotland គឺមានលក្ខណៈចម្រុះ។ ប្រតិបត្តិការយោធាដែលអាចធ្វើទៅបានមកលើកោះនេះ អាចកើតឡើងក្នុងរូបភាពដែលភាគីរបស់លោកពុំបានដឹង។ 

លោកនិយាយថា កងទ័ពកំពុងព្យាយាមឲ្យពួកគេក្លាយជា ផ្នែកសំខាន់សម្រាប់ប្រទេស និងសម្រាប់សម្ព័ន្ធយោធាណាតូ។ លោក Lunde និយាយថា ទាហានកំពុងហ្វឹកហាត់ខ្លាំង ហើយ នៅថ្ងៃអង្គារនេះ មន្ត្រីជាន់ខ្ពស់មកពីយោធាស៊ុយអែត និងសម្ព័ន្ធយោធាណាតូ មានផែនការពិភាក្សាអំពីកិច្ចខិតខំប្រឹងប្រែងសម្របសម្រួលនៅលើកោះនេះ ហើយភាគីទាំងពីរ ត្រូវបានគេរំពឹងថានឹងពង្រឹងការត្រៀមខ្លួនជាស្រេចសម្រាប់ការប្រយុទ្ធ។