ស៊ីហ្គេម៖ គណៈអចិន្ត្រៃយ៍គណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានបន្ដបើកកិច្ចប្រជុំប្រចាំសប្ដាហ៍ដើម្បីត្រួតពិនិត្យ និងជំរុញការងារក្នុងទិសដៅពង្រឹងផែនការត្រៀមឆ្ពោះទៅរកភាពជោគជ័យ ក្នុងព្រឹត្តិការណ៍ជាកំណត់ត្រាប្រវត្តិសាស្ត្ររបស់កម្ពុជានៃការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣។
កិច្ចប្រជុំនេះបានធ្វើឡើងក្រោមវត្តមានឯកឧត្តមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងអនុប្រធានអចិន្ត្រៃយ៍ CAMSOC នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២៧ ខែកក្កដា ឆ្នាំ២០២១ ក្រោមរបៀបវារៈសំខាន់ៗ ៣ ទី១-ការត្រួតពិនិត្យលើសេចក្តីព្រាងរបាយការណ៍ឆមាសទី១ និងលើកទិសដៅសមាសទី២ ឆ្នាំ២០២១ ទី២-ការត្រួតពិនិត្យការងារទីលានប្រកួត និងទី៣-ការពិភាក្សាលើការងារគ្រប់គ្រងពហុកីឡដ្ឋានជាតិមរតកតេជោ បន្ទាប់ពីសាងសង់រួចជាស្ថាពរ។ ទន្ទឹមជាមួយគ្នា ឯកឧត្តមបណ្ឌិត ថោង ខុន ក៏បានជំរុញដល់លេខាធិការដ្ឋាន CAMSOC និងគណៈកម្មការជំនាញទាំង ១៤ ឲ្យពង្រឹង និងយកចិត្តទុកដាក់បន្ថែមលើការងារជំនាញនីមួយៗ ត្រូវពន្លឿនឲ្យបានរួចរាល់ក្នុងឆ្នាំ២០២១ ដ្បិតឆ្នាំ២០២២ ត្រូវបើកយុទ្ធនាការការមានការងារជាច្រើន ពិសេសការត្រៀមពិធីបើក-បិទដែលជាពិធីដ៏សំខាន់។ លើសពីនេះ ឯកឧត្តមក៏បានជំរុញឲ្យយកចិត្តទុកដាក់ និងតាមដានវឌ្ឍនភាពការងារមួយចំនួនទៀត ដូចជាការសាងសង់ភូមិកីឡា និងការបញ្ជូនអត្តពលិកទៅហ្វឹកហាត់នៅចិនជាដើម។
ជាមួយគ្នានោះ កិច្ចប្រជុំក៏បានពិភាក្សាបន្ថែមលើកម្មវិធីសុំភ្លើងអាទិទេពកីឡាស៊ីហ្គេម-អាស៊ានប៉ារ៉ាហ្គេម និងដំណើរផ្លូវរត់ភ្លើងគប់ ដែលត្រូវបានរាជរដ្ឋាភិបាលជ្រើសរើសយកសេណារីយ៉ូទី១ ដោយត្រូវប្រារព្ធពិធីនៅខេត្តសៀមរាប ហើយដង្ហែភ្លើងគប់នេះនៅតាមបណ្តាប្រទេសនានាជាសមាជិកអាស៊ីអាគ្នេយ៍ រួចហើយរត់ភ្លើងគប់នេះចូលរួមកម្ពុជាវិញ និងបន្តរត់ភ្លើងគប់នៅជុំវិញខេត្តជាប់បឹងទន្លេសាប មុនបន្ដរត់ចូលទៅពហុកីឡដ្ឋានជាតិមរតកតេជោ ដែលជាកន្លែងប្រារព្ធពិធីបើកការប្រកួតកីឡាស៊ីហ្គេមផ្លូវការ នៅថ្ងៃទី០៥ ខែឧសភា ឆ្នាំ២០២៣៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
